Ա. Աթեշյանը Հայաստանում է
Հայաստան է ժամանել Արամ արքեպիսկոպոս Աթեշյանը, որն այս պահին գտնվում է Էջմիածնում: Հիշեցնենք, որ այն բանից հետո, երբ Գերմանիայի Բունդեսթագը Հայոց Ցեղասպանության ճանաչման բանաձեւ ընդունեց, Արամ արքեպիսկոպոս Աթեշյանը ափսոսական նամակ հղեց Թուրքիայի նախագահ Ռեջեփ Թայիփ Էրդողանին` առաջ բերելով Հայաստանում եւ Սփյուռքում հասարակության բուռն դժգոհությունը: Բանը հասավ այնտեղ, որ հնարավոր բողոքի ակցիաներից խուսափելու համար, ամենայն հավանականությամբ իշխանությունների` Մայր Աթոռին իջեցված հրահանգով, վերջինս չմասնակցեց Գերագույն Հոգեւոր խորհրդի նիստերին, որոնք գումարվեցին Մայր Աթոռում (ի պաշտոնե նա համարվում է ԳՀԽ փոխնախագահներից մեկը), եւ չժամանեց Հայաստան այդ օրերին, եւ միայն այն բանից հետո, երբ Գերագույն Հոգեւոր խորհրդի նիստը անցկացվեց Նյու Յորքում շաբաթներ առաջ, վերջինս մասնակցեց արդեն ԱՄՆ մեկնելով: Հիշեցնենք, որ Պոլսո Հայոց պատրիարքարանում տարեսկզբին տեղի է ունեցել պատրիարքի տեղապահի ընտրություններ: Ի սկզբանե տեղապահի ընտրություններում թեկնածությունն առաջադրել էր երեք հոգեւորական`Պոլսո Հայոց պատրիարքական փոխանորդ Արամ արքեպիսկոպոս Աթեշյանը, Գերմանիայի Հայոց թեմի առաջնորդ Գարեգին արքեպիսկոպոս Բեքչյանը եւ Պոլսո Հայոց պատրիարքարանի հոգեւոր խորհրդի նախագահ Սահակ եպիսկոպոս Մաշալյանը: Վերջինս, սակայն ընտրություններից մեկ օր առաջ հայտարարել է իր թեկնածությունը հանելու մասին, որպեսզի ձայները չբաժանվեն եւ Արամ Աթեշյանի ընտրվելու հնարավորությունը չմեծանա։ Միաժամանակ, նա ընտրություններին մասնակցող հոգեւորականներին կոչ է արել քվեարկել Գարեգին արքեպիսկոպոս Բեքչյանի օգտին։ Տեղապահ ընտրվել է Գարեգին արքեպիսկոպոս Բեքչյանը:
Հետևեք մեզ Viber-ում
