«Ելք»-ը ունի մարդիկ, ովքեր չեն պատրաստվում «Ղարաբաղը ծախել»
«Ելք» խմբակցության անդամ Արամ Սարգսյանն այսօր հայտարարեց, որ իրենք կարող են իշխանությանը հակակշիռ լինել և պատրաստ են իրենց վրա պատասխանատվություն վերցնել: Անդրադառնալով «Ծառուկյան» խմբակցությանն արված առաջարկին՝ Արտակ Զեյնալյանի թեկնածությունը ՀՀ նախագահի պաշտոնում պաշտպանելու մասին, Արամ Սարգսյանն ասաց, որ այդպիսով ցույց են տալիս, որ որպես ընդդիմություն՝ պատրաստ են մասնակցել քաղաքական գործընթացներին, ունեն համապատասխան ռեսուրսներ և ծրագրային նպատակներ, որ ունեն մարդիկ, ովքեր չեն պատրաստվում «Ղարաբաղը ծախել», կարող են բանակցել: Հարցին, թե հնարավո՞ր է «Ելք»-ը միանա «Ծառուկյան» դաշինքին և որոշեն միասին դառնալ այլընտրանք, ինչին Արամ Սարգսյանն ի պատասխան ասաց, որ «Ելք»-ն ուզում է այլընտրանք լինել իշխանությանը՝ ներգրավելով Հայաստանի ողջ հանրությանը, բոլոր նրանց, ովքեր դժգոհ են իշխանությունից: «Մենք մեր հայտը ներկայացնում ենք հանրությանը, ոչ թե առանձին կուսակցությանը: Մենք առանձին կուսակցությանն ասում ենք՝ առաջադրել ենք, խնդրում ենք՝ նայեք ինչքանով է հնարավոր մեր թեկնածուին սատարել: Այստեղ փորձել հակադրություն գտնել, բանավեճի տանել մեզ, գտնում եմ ոչ ճիշտ և ոչ նպատակահարմար», - նշեց պատգամավորը։
Հետևեք մեզ Viber-ում
