Բացառում եմ Լեռնային Ղարաբաղի վերադարձն Ադրբեջանի կազմ․ Զատուլին

ՌԴ Պետդումայի պատգամավոր Կոնստանտին Զատուլինը կազմակերպված տեսակամուրջի ժամանակ հայտնել է, որ Ադրբեջանը չի կարողանում դուրս գալ այն փակուղուց, որում ինքն իրեն դրել է սեփական հռետորաբանությամբ: Երկիրը նման կերպով արգելափակում է Լեռնային Ղարաբաղի հակամարտության խաղաղ կարգավորման հեռանկարը: Ըստ նրա մոտ ժամանակներում լուրջ առաջընթաց չի սպասվում Լեռնային Ղարաբաղի հակամարտության կարգավորման հարցում: Ըստ նրա, եթե ապագայում հակամարտությունում չվերսկսվեն նոր սուր պոռթկումները և ռազմական գործողությունները, ապա կլինի արյունահեղություն: Անդրադառնալով Ռուսաստանի կողմից Ադրբեջանին զենքի վաճառքի փաստին՝ ՌԴ Պետդումայի պատգամավորն ընդգծեց, որ դա արվել է այն պայմանով, որ տվյալ երկիրը զսպվածություն կդրսևորի և չի օգտագործի զենքը ԼՂ հակամարտության գոտում: «Ես Լեռնային Ղարաբաղը դիտարկում եմ որպես ինքնորոշված տարածք, և հակված չեմ մտածելու, որ այն երբևէ, որևէ հանգամանքների պայմաններում կվերադառնա Ադրբեջանի կազմ: Դա, իմ կարծիքով, դեպքերի զարգացման բացարձակ անհնար տարբերակ է, իսկ ադրբեջանական լրատվամիջոցներում շատ հաճախ հնչող վիրավորանքներն ու ծայրահեղ գնահատականները որևէ կերպ չեն կարող օգնել կողմերին: Ադրբեջանական ԶԼՄ-ների հռետորաբանությունն ավելի շատ թուլացնում է Ադրբեջանի հեղինակությունն արտաքին աշխարհում, քան օգնում: Ինչպես կարող է օգնել երկրին այն հայտնի փաստը, երբ Հունգարիայում ՆԱՏՕ-ի զորավարժությունների շրջանակում հայ գործընկերոջը կացնահարած ադրբեջանցի սպային դարձրեցին ազգային հերոս, ազատ արձակեցին և բարձրացրեցին պաշտոնը: Նման մոտեցման դեպքում ի՞նչ փոխըմբռնում կարելի է ակնկալել հայկական կողմից»,- ասաց նա: