Բեմում «Նիկոլից ավելի Նիկոլ» կատարումն է․․․

Երեկ Փաշինյանը հայտարարեց, որ Ղազախստանից ցորեն է ներմուծվում Հայաստան՝ Ադրբեջանի և Վրաստանի տարածքով։ Վարչապետի մանիպուլյացիոն հայտարարություններին ծանոթ լինելով՝ մտածեցի, որ Վրաստանի անունը «նավսյակի» է տվել։ Պատմությունը սկսում է հիշեցնել այն իրավիճակը, երբ Ադրբեջանը փակում էր Արցախի գազի «վինծիլը»․ կարծես մոտենում ենք նույն տրամաբանությանը։

Այդ մտքին հանգեցի հատկապես այն բանից հետո, երբ Փաշինյանը գովասանք հղեց Ադրբեջանին՝ ասելով. «Նախագահ Ալիևը երեկ հայտարարեց, որ Ադրբեջանը հանում է սահմանափակումները իր տարածքով Հայաստան ապրանքների տարանցիկ մատակարարումների վրա։ Ես ցանկանում եմ իմ գովասանքը հայտնել Ադրբեջանի նախագահի այս քայլի կապակցությամբ և ողջունել տվյալ հայտարարությունը»։

Այսօր Ազգային ժողովում Ռուբեն Ռուբինյանը փորձեց «Նիկոլից ավելի Նիկոլ» խաղալ։ ԱԺ նախագահի տեղակալը՝ արձագանքելով «Հայաստան» խմբակցության պատգամավոր Գեղամ Մանուկյանի դիտարկմանը, ասաց, որ ցորենը ոչ թե երկաթգծով է անցնելու Ադրբեջանի տարածքով և մտնելու է Իջևան, այլ պարզապես հասնելու է Վրաստան և Վրաստանի տարածքով մտնելու է Հայաստան»։ Այսինքն՝ ստացվում է, որ Ադրբեջանը ցորենի հետ որևէ կապ չունի, և մատակարարումը իրականացվելու է բացառապես Վրաստանի միջոցով։

Այդ դեպքում ինչո՞ւ էր Փաշինյանը գովասանագիր հանձնում Ալիևին։ Կամ Ալիևը տեղյա՞կ է, որ իր երկրի տարածքը ոչ մի կերպ առնչություն չունի Հայաստան ցորեն մատակարարելու հետ։ Թե գուցե տեղյակ է ու պարզապես հիացած հետևում է «բեմի վրա նիկոլների խաղին»՝ մտքում ունենալով Արցախի «վինծիլի» իր ժամանակների փորձը։ 

Պատմությունը, ցավոք, իսկապես սկսում է հիշեցնել այն օրերը, երբ գազի ծորակը դառնում էր քաղաքական հենակետ։ Բեմում՝ Նիկոլներ, ետնաբեմում՝ վինծիլի հիշողություն։

Հասմիկ Բաբաջանյան

«Հրապարակ օրաթերթ»