Եկեղեցու խախտումը ընկալվում է որպես ոչնչացման վտանգ

Նիկոլ Փաշինյանի արածը այնքան էժանագին սցենար ունի, որ ոչ մի բանի չի դիմանում։ Այնպես է ցույց տալիս, որ իբր ինքը տեղյակ չի, թե ինչ է կատարվում՝ ում են ձերբակալում, ում հետևից են գնում։ Մոռանում է, որ հետքերը դեռ թարմ են, երբ հայհոյում, ահաբեկում էր եկեղեցու առաջնորդին , որպեսզի հրաժարվի կաթողիկոսությունից։ Դրանք փաստեր են, որոնք հետո իրար են գումարվելու և իր իշխանության ողջ պատկերը ներկայացնեն։ Նրա ողջ արածը փուչիկներ են, որոնք կարճաժամկետ հաճույքի համար փչում է, բայց դե, փուչիկ են, կամ պայթելու, կամ շունչները փչելու են։ Ուզում եմ հասկանալ՝  կաթողիկոսին փոխելով, պետությունը ուժեղանալու՞ , թե թուլանալու է։

Ոչ մի փաստարկ չի կարող  բերվել, որ դրանից մեր պետությունը ուժեղանալու է։ Առաջին անգամ չի այս իշխանությունը   պետական ինստիտուտ փլուզում՝ ազդեցիկ մարդկանց մեկուսացնելով ու ցույց տալով, որ անհատներից է ազատվում։ Եկեղեցին այդ կառույցը չի։ Եկեղեցու խախտումը մարդիկ ընկալում են որպես  ոչնչացման վտանգ։  Դա միայն հավատ, արժանապատվություն, հոգևոր արժեքներ չի։ Դա անվտանգություն է, պաշտպանություն ու եթե ուզում ես իմանալ  մոր կաթ։ Սրբազաններին փակի տակ պահելով, հոգևոր մարդուն զրկում եք մոր կաթից , որ ծնված օրից ստանում ու իրեն ապահով է զգում։ Դուք իշխանության եք եկել, որ առաջին հերթին մեր երկրի, մեր ժողովրդի անվտանգությունն ապահովեք։ Ոչ թե թշնամու հետ սինխրոն հային կտրեք իր սնուցումից։

Եկեղեցու խախտումը  հասարակության շրջանում  անվստահություն, անկայունություն, պառակտում  մտցնել է՝ քահանային հանելով իրեն օծողի դեմ․․․ Թիմակիցդ ասում է գործ տալը վեհ գործ է։ Մեջբերումս բառացի չէ։ Ես էդ վիզը ծուռ քահանային չեմ մեղադրում, վաղը նրան էլ եք փուռը տալու։  Լավ, ինչքա՜ն կարելի է թշնամու սրտով անել, թշնամուն ուրախացնել։ Կաթողիկոսին պաշտոնանկ անելով,  երկիրը քայքայման ռիսկի տակ է դրվում։ Փլուզվում է մեր պետությունը, չասե՞ն․․․Ասողին ինչու՞ եք ձերբակալում, որ բոլորս միասին մնանք փլատակների տա՞կ։  Ասենք՝ մանկապարտե՞զ ես վերանորոգում, դասախոսությու՞ն  ես կարդում․․․  Ախր մարդիկ  բաց աչքերով տեսնում են, որ մեր Տան հիմքը նստում, Տունը փլվում է։

Հասմիկ Բաբաջանյան

«Հրապարակ օրաթերթ»