«2018 թվականին մենք ևս պետք է գոտիներս ձգած ռեժիմում գտնվենք». Վարդան Բոստանջյան

Այսօր Հայելի ակումբում  լրագրողների հետ հանդիպման ժամանակ «Ծառուկյան» խմբակցության պատգամավոր Վարդան Բոստանջյանը նկատեց, որ գնաճը սպասելի էր: Ըստ նրա՝ 4-5 տոկոս տնտեսական աճը, որին  Հայաստանի կառավարությունը ձգտում է հասնել 2018 թվականին, չի կարող փոխհատուցել գնաճային ճնշումները: Այնուհետև հայտարարեց, որ գնաճը հանկարծակի երևույթ չէր և պայմանավորված էր մի շարք հանգամանքներով. «ԵԱՏՄ-ում հանգրվանելու պարագայում արդեն իսկ հասկանալի էր, որ պայմանավորվածություն կար անդամ երկրների հետ, որ ՀՀ-ում մաքսային փոփոխությունները սկսեին աշխատել 2018 թվականից, որն արդեն իսկ հայտնի էր, որ բերելու էր թանկացման: Հայտնի էր, որ նույն մաքսային տարածքում գործելու պարագայում՝ պետք է թանկացումներ տեղի ունենային: Բայց միայն սրանով չէր պայմանավորված, կա նաև ակցիզային ապրանքների տիրույթի մեծացում, ինչպես նաև դրույքաչափերի բարձրացում: Երրորդ հանգամանքն էր տրանսֆերտների ծավալի փոքրացումը, գնալով դրանք փոքրանում են: Սա գործոն էր, որի պարագայում ՀՀ-ի գնաճային ճնշումները նկատելի չէին լինում»: Բանախոսի համոզմամբ՝ ներկայիս դրությունից դուրս գալու համար անհրաժեշտ է խթանել հայրենական արտադրությունը, որը իր հերթին, կբերի զբաղվածության աճին։ Պետք է նաեւ հոգ տանել երիտասարդների զբաղվածության մասին, քանի որ նրանց է բաժին ընկնում գործազրկության առյուծի բաժինը։ «2018 թվականին մենք ևս պետք է գոտիներս ձգած ռեժիմում գտնվենք: Կառավարության կողմից արված քայլերը 2018 թվականին կստեղծեն նախադրյալներ՝ մեր խոցելի պահերը հետագայում շտկելու համար»,- ասաց նա: