Այդ համեմատությունը ծիծաղելի է: Արդյոք Անգելա Մերկելի եղբայրը փայատե՞ր է «Մերսեդես» ընկերությունում

Նախագահ Սերժ Սարգսյանի վերջին հարցազրույցի մասին ԱԺ նախագահ Արա Բաբլոյանի խորհրդական Մկրտիչ Մինասյանը խոսելիս, նախ նշեց, որ հարցազրույցում մեր ժողովրդին հետաքրքրող բոլոր հարցերին ընդհանրական գնահատական, պատասխան տրվեց: Ըստ նրա՝ ճիշտ կլինի, որ դա շարունակական լինի, և յուրաքանչյուր տարի նախագահը հանդես գա ամփոփիչ ասուլիսով: «Ես շահարկողներից մեկն եմ, ու, եթե այդ շահարկումը չլիներ, ինչո՞ւ պետք է հավաքվեինք քննարկելու: Մի կողմից՝ դա շատ դրական է: ՀՀ նախագահը պետք է հաշվետվություն տար, տարին ամփոփեր Հանրային հեռուստատեսության եթերով, իսկ սա պաշտոնական չէր:Սերժ Սարգսյանն ասաց, որ սով, հերթեր չեն լինի, թանկ կլինեն մեր ապրանքները,  բայց հսկողության տակ կլինի գնաճը: Գլխավոր հարցերի մասին չխոսեց Սերժ Սարգսյանը: Մեր ոխերիմ հարեւանը՝ Թուրքիան, Լոզանի կոնֆերանսի  արդյունքները վերանայելու առաջարկ է անում,  մենք ինչո՞վ ենք դրան պատասխանում: Կամ` ինգուշները  Ռուսաստանում սպառնացին հայերին, քանի որ հայերը  լավ են զգում Ռուսաստանում: Ինգուշներն ասել են՝ կպատժեն հայերին:  Եթե  պատժեն հայերին, երկու միլիոն մարդ Ռուսաստանից  հետ կգա Հայաստան, մենք պատրա՞ստ ենք դրան: Այս հարցերի մասին պիտի խոսվեր»,- նշեց ասուլիսին ներկա՝ Գերագույն խորհրդի նախկին պատգամավոր Ազատ Արշակյանը: «Ելք» դաշինքի անդամ Ալեն Սիմոնյանն էլ ասաց, որ որևէ նոր, ուշագրավ բան չի ասել Սերժ Սարգսյանը:  «Այդ հարցազրույցը կարող էր չլինել: Եթե նույն  բովանդակությամբ խոսեր  այլ պատգամավոր, գուցե չլուսաբանվեր այդ հարցազրույցը: Լավ կլիներ, որ Սերժ Սարգսյանը ՌԴ նախագահի նման գոնե  երեք-չորս ժամ պատասխաներ հանրության հարցերին»: Լրագրողներից մեկի հարցին, թե ՀՀԿ փոխնախագահ Արմեն Աշոտյանը, խոսելով Սերժ Սարգսյանի երրորդ անգամ հավանական պաշտոնավարման մասին, մատնացույց էր արել Գերմանիայի կանցլեր Անգելա Մերկելին, որը երկար տարիներ ղեկավարում է Գերմանիան, արդյոք ընդունելի՞ է նրա համար  այս համեմատությունը, ասաց. «Այդ համեմատությունը ծիծաղելի է: Արդյոք Անգելա Մերկելի եղբայրը փայատե՞ր է «Մերսեդես» ընկերությունում: Կամ` ԴԱՀԿ-ի պե՞տն է միայն Գերմանիայում ներկրում նրբերշիկներ»: