Հանրապետական կոնգրեսականի գրասենյակում սվաստիկայով ԱՄՆ դրոշ են գտել․ Politico
Սվաստիկայով ԱՄՆ դրոշ է հայտնաբերվել հանրապետական կոնգրեսական Դեյվ Թեյլորի (Օհայո նահանգ) գրասենյակում, Կապիտոլիումի ոստիկանության մասնակցությամբ ստուգում է իրականացվում։ Այս մասին գրում է Politico-ն։
Պարբերականի տրամադրության տակ է հայտնվել առցանց հանդիպման սքրինշոթը, որին մասնակցել է Թեյլորի գրասենյակի աշխատակիցներից մեկը՝ Անջելո Էլիան։ Նրա գրասենյակի պատին երևում է ԱՄՆ փոքր դրոշ, որի կարմիր գծերը փոփոխված են այնպես, որ սվաստիկա են կազմում։
«Ինձ տեղեկացրել են մի պատկերի մասին, որում, ըստ ամենայնի, իմ ենթակայի կողքին՝ իմ գրասենյակում, պատկերված է զզվելի և չափազանց անտեղի խորհրդանիշ։ Այդ պատկերի բովանդակությունը չի արտացոլում այն արժեքներն ու սկզբունքները, որոնք ընդունված են իմ գրասենյակում և կիսվում են իմ ենթակաների կամ իմ կողմից և ես ամենավճռական կերպով դատապարտում եմ դա», - կոնգրեսմենի մեկնաբանությունը մեջբերում է պարբերականը։
Նա վստահեցրել է, որ արդեն ստուգում է նախաձեռնել, որը նրա գրասենյակն իրականացնում է Կապիտոլիումի ոստիկանության հետ համատեղ։ Քաղաքական գործիչը հավելել է, որ հետագա մեկնաբանությունները կտրվեն այդ ստուգումների արդյունքներով։
Հետևեք մեզ Viber-ում
