3-րդ կարգի ցեղատեսակի վրա ուզում են փորձարկում անել. Զոհրաբյանը՝ Ալթունյանին

ԱԺ-ում ընթացող «Հայաստանի Հանրապետությունում մարդու պապիլոմա վիրուսի դեմ պատվաստումների վերաբերյալ» թեմայով քննարկման ժամանակ «Ծառուկյան» խմբակցության պատգամավոր Նաիրա Զոհրաբյանն առողջապահության նախարարության ներկայացուցիչներին հարցրե՞ց, թե ո՛րն է «Գարդասիլ» պատվաստանյութը ներարկելու հրատապությունը: «Ինձ մոտ տպավորությունն այնպիսին է, որ ինչ-որ մի, կներեք, երրորդ կարգի ցեղատեսակի վրա ուզում են փորձարկման հերթական փուլն ավարտեն, հետո հասկանան արդյունքները»,- ասաց Նաիրա Զոհրաբյանը: Պատգամավորն առաջարկեց 1-2 տարի էլ սպասել, քանի որ  կան երկրներ, որտեղ հրաժարվել են  «Գարդասիլ» պատվաստանյութով պատվաստումից: ՀՀ առողջապահության նախարար Լեւոն Ալթունյանը պատասխանեց, որ հրատապությունը պայմանավորված է այլ գործոններով: «Միանշանակ ապացուցված է, որ ո՛չ սնունդը, ո՛չ մեքենաների արտանետումները մեղավոր չեն արգանդի վզիկի քաղցկեղի առաջացման համար: Հարուցիչը պապիլոմա վիրուսն է»,- ասաց Լեւոն Ալթունյանը: Նախարարի խոսքով՝ «Պապիլոմա» վիրուսի դեմ պատվաստման համար հիմք է հանդիսացել առողջապահական համաշխարհային կազմակերպության զեկույցը, որտեղ կազմակերպությունը փոխել է իր դիրքորոշումը՝ խորհրդատվականից անցել է միանշանակ, իմպերատիվ խորհրդի: Կազմակերպությունը հայտարարել է նաեւ, որ պատվաստանյութը 100 տոկոսով անվտանգ է: Նաիրա Զոհրաբյանն էլ հակադարձեց. «Քիչ չե՞ն դեպքերը, երբ ԱՀԿ-ն փոխում է իր կարծիքը դեղերի մասին: Հիմա ո՞րն է երաշխիքը, որ նույն բանը չի լինի: Դուք տալի՞ս եք այդ երաշխիքը»,- հարցրեց Նաիրա Զոհրաբյանը: Առողջապահության նախարարն ասաց, որ չկան դեպքեր, երբ ԱՀԿ-ն  180 տոկոսով փոխել է իր դիրքորոշումը պատվաստանյութերի մասին: