Հացադուլ հայտարարած նախկին ուսանողը պատասխանում է ԵՊՀ ռեկտորին

«Հանուն գիտության զարգացման» նախաձեռնության երկու անդամները, որոնք այսօր վերսկսել են հացադուլը, քիչ առաջ ֆեյսբուքյան ուղիղ եթերում արձագանքեցին իրենց հասցեին հնչեցված մեղադրանքներին ու քննադատություններին: Յուրի Ավագյանն անդրադարձավ Երեւանի պետական համալսարանի ռեկտոր Արամ Սիմոնյանի հայտարարությանը, թե ինքը ԵՊՀ ուսանող չէ, եւ հեռացվել է անբավարար առաջադիմության պատճառով: «Անբավարար առաջադիմությամբ հեռացված ուսանողը հիմա որոշել է գիտության համար պայքարել, ծիծաղելի չէ՞ դա: Նա ընդհանրապես կապ չունի ԵՊՀ-ի հետ: Հիմա, որ գնացել մտել են լսարան, ի՞նչ անեմ: Ես ընդհանրապես ուշադրություն չեմ դարձնում: Ավանտյուրա են անում, հիմա ես ի՞նչ անեմ: Կզզվեն իրենց արածից, կթողեն կգնան»,- Tert.am-ի հետ զրույցում ասել է ԵՊՀ ռեկտոր Արամ Սիմոնյանը՝ խոսելով Մայր բուհում հացադուլ անող երիտասարդների մասին: Ռեկտորին ի պատասխան՝ Յուրի Ավագյանը եթերում պատմեց, որ ստիպված է եղել ընդհատել ուսումը: Չնայած դրան՝ իրեն համարում է ԵՊՀ ուսանող եւ շարժմանն էլ որպես պետհամալսարանի ուսանող է միացել:  Գրում է armtimes.com-ը: «Ես ընդունվել եմ Երեւանի պետական համալսարան՝ 2013 թվականին, այնուհետեւ զորակոչվել եմ բանակ՝ չստանալով տարկետում: Վերադարձել եմ եւ ուսումս շարունակել առաջին կուրսից: Սովորել եմ երկու կուրս: Երկրորդ կուրսի երկրորդ կիսամյակում առհասարակ չեմ մասնակցել ոչ մի քննության: Ինչի՞ համար, հարց է  առաջանում: Ես ստիպված եմ եղել աշխատել՝ իմ գոյությունը պահպանելու համար, ոնց որ շատ ու շատ ուսանողներ: Մարդիկ կան, որոնք փոխում են հեռակա, մարդիկ կան, որոնք առհասարակ չեն շարունակում ուսումը: Իմ կյանքում այնպիսի իրավիճակ է եղել, որ ես այդ ժամանակ ուղղակի ֆիզիկապես չէի կարող մասնակցել քննություններին, որովհետեւ երկուսից-երեք տեղ էի աշխատում»,- ասաց Յուրի Ավագյանը: Շարունակելով՝ նա նշեց. «Չներկայանալու պատճառով ինձ զանգահարել են, տեղեկացրել են, որ պետք է հեռացնեն: Ես ասել եմ՝ լավ, թող հեռացումը լինի, ես թեկուզ մի տարի հետ կընկնեմ, կգամ իմ ուսումը կշարունակեմ: Ես հիմա ինչ-որ ասում եմ, օրինական գործընթաց է, ցանկացած ուսանող կարող է մի տարով հետ ընկնել տարբեր պատճառներով: Եթե սա (ռեկտորի հայտարարությունը-խմբ.) ինչ-որ մեսիջ էր, որ այլեւս ուսումս չեմ կարող շարունակել կամ ինչ-որ բան, չգիտեմ: Համենայնդեպս, ես փորձելու եմ շարունակել՝ անկախ ռեկտորի արած հայտարարությունից»: Յուրի Ավագյանը եղել է սոցիոլոգիայի ֆակուլտետի սոցիալական աշխատանք բաժնի ուսանող: Նա եւ «Հանուն գիտության զարգացման» նախաձեռնության անդամ Դավիթ Պետրոսյանն այսօր հացադուլ են հայտարարել՝ պահանջելով պահպանել ուսանողներին տրամադրվող ակադեմիական տարկետման իրավունքը: «Զինապարտության մասին» նոր օրենքով դա էապես սահմանափակվում է: Ուսնողներն այդ օրենքի դեմ պայքարի շրջանակներում սկզբում դասադուլ հայտարարեցին, հետո հացադուլ, բայց որոշ ժամանակ անց հրաժարվեցին այդ ծարհահեղ քայլից եւ գնացին իշխանությունների հետ բանակցելու ճանապարհով: Քննարկումներն անարդյունավետ համարելով՝ ուսանողները նորից հացադուլ են սկսել: