Ում համար է կեղծվում իրականությունը

Սերժ Սարգսյանի «Արմենիա» հեռուտաընկերությանը տված հարցազրույցում ի թիվս այլ հարցերի ուշագրավ անդրադարձ է կատարել նաեւ իրավապահ համակարգի գործունեությանը։ Ի տարբերություն բոլորովին վերջերս Քննչական կոմիտեում և ոստիկանությունում նրա ունեցած ելույթներին , այս անգամ Սերժ Սարգսյանն իրավապահների մասին խոսեց ոչ թե դիտողությունների և դժգոհության, այլ բարյացակամության տոնով՝ արձանագրելով, որ նրանք ամեն ինչ անում են իրավիճակը վերահսկելու և խնդիրները լուծելու համար: Իհարկե, դժվար է հասկանալ, թե այդ ինչ է փոխվել մի քանի շաբաթների ընթացքում, սակայն առանց հասկանալու էլ Հայաստանում իրավապահ մարմինների թերացումներն ակնառու են։ Հատկապես զարմանալի է, որ Սերժ Սարգսյանը դրական է արտահայտվում այդ մարմինների կանխարգելման աշխատանքների վերաբերյալ ասելով․«Այս առումով կարծում եմ մեր երկրում մեծ աշխատանք է կատարվում և եթե պարզ թվերը վերցնելու լինենք, օրինակ սպանությունները մեզ մոտ տարեց տարի կրճատվում են։ Օրինակ այս տարի դիտավորյալ սպանությունները, թվեր չասեմ, որպեսզի շահարկումների առարկա չդառնա, որովհետև տարին չի լրացել, բայց մոտավորապես 15-20 տոկոսի սահմաններում կրճատում է տեղի ունեցել, և տեղի ունեցած բոլոր աղմկահարույց սպանություններն էլ, գրեթե բոլորը, բացահայտվել են, կատարողները ձերբակալվել են։ Տա Աստված, որ մի օր գանք հասնենք մի իրավիճակի, որ մեր երկրում սպանություններ չլինեն, բայց որևէ երկիր հանցագործություններից ապահովագրված չէ» ասում է նա։ Իհարկե, հնարավոր է եւ բնական, որ Հայաստանում հանցագործությունների ցուցանիշների կրճատում է նկատվում, թեպետ ամենօրյա լրահոսը հակառակի մասին է խոսում։ Խնդիրն այն է, որ արտագաղթի նման տեմպերի ու դատարկվող Հայաստանի պարագայում, որտեղ քաղաքացիների թվի շեշտակի նվազում կա, պետք է նվազի նաեւ հանցագործությունների ցուցանիշը, ի վերջո, մտավոր կորիզի հետ մեկտեղ երկիրը լքողների մեջ նաեւ պոտենցիալ հանցագործներն են։ Սակայն խոսել կանխարգելման աշխատանքների մասին ու դրական քողի ներքո դա ներկայացնել առնվազն զարմանալի է։ Ընդամենը վերջին մի քանի ամիսներին Հայաստանի ողջ տարածքում տեղի ունեցած մի շարք աղմկահարույց միջադեպերը, վենդետաները, կրիմինալ կլանների բախումը վկայում է այն մասին, որ իրականում իրավապահների կողմից կանխարգելիչ աշխատանքների մակարդակտ զրո է, այլապես նախապես կհայտնաբերվեին ու կկանխարգելվեին այդ հանցագործությունները։ Ի վերջո, ընդամենը մեկ տարի առաջ մայրաքաղաքի սրտում տեղի ունեցած զինված ապստամբությունը վկայում է այն մասին, որ ոչ միայն աշխատանքներ չեն տարվում, այլեւ իրավապահ մարմիններն իրենց տեղում չեն։ Խոսքը Սասնա ծռերի զինված ապստամբության մասին է, որը գրավեց ոստիկանության ռազմավարական նշանակության օբյեկտը՝ ՊՊԾ գունդը ։ «Ինչ վերաբերում է Երևանի անվտանգությանը, այստեղ կարծում եմ, ամենաճիշտ մոտեցումը, մեր սեփական զգացողությունն է և մեր հյուրերի կարծիքը։ Լավ կլինի, երեկոյան դուրս գաք, փառք Աստծո, թեև դեկտեմբերի կեսերն է, Երևանում զբոսաշրջիկների պակաս չկա, հարցնեք, ինչպես է ինքը զգում Երևանում և կարող է արդյո՞ք գիշերը 1-ին, 2-ին մենակ առանց ուղեկցողի, ենթադրենք, ռեստորանից հասնել հյուրանոց և այլն։ Այս առումով, կարծում եմ, մեր վիճակը բավարար է, թեև մենք իրավունք չունենք հանգստանալ այս ձեռքբերումներով, մենք, իրոք պետք է լինենք շատ անվտանգ երկիր՝ անվտանգ երկիր ներսում, և անվտանգ երկիր մեր սահմաններում» շարունակում է նախագահը։ Նախ Սերժ Սարգսյանը անտեսում է հայ ժողովրդի ազգային մենթալիտետը, որ հայ ժողովուրդը ի տարբերություն շատ ու շատ ազգերի խաղաղասեր է ։ Իսկ ընդհանրապես Հայաստանում ոստիկանության ուռճացված աշխատակազմի ու հարուստ բյուջեի պարագայում կարելի էր ընդհանրապես կանխել ցանկացած հանցագործություն։ Հիշենք, որ միայն տեսանկարահանող սարքերի արդյունքում տարեկան մոտ 12 մլրդ գումար է մուտք լինում։ Սակայն այս ամենը չի խանգարում, որ Երեւանը «անապահով» դառնա նույն բարձրաստիճան ոստիկանության հովանու ներքո, մայրաքաղաքում թանկարժեք ավտոմեքենայի պահեստամասերի անվերջանալի գողությունների մասին մենք մեկ անգամ չէ, որ գրել ենք, գրել ենք նաեւ կասկածների մասին, որ գործընթացը անպատիժ կարող էր մնալ միայն բարձր հովանու շնորհիվ։ Ինչեւէ, պակաս ուշագրավ չէր նաեւ Սերժ Սարգսյանի անդրադարձը Հայաստանի դեմոգրաֆիկ խնդիրներին եւ Հայաստանում 2040 թվականին բնակչության թիվը չորս միլիոնի հասցնելու իր ծրագրի մասին։ Ընդունելով, որ այդ հարցը հնարավոր չէ կարգավորել ծնելիությամբ, ամուսնություններով, Սերժ Սարգսյանը ասում է, որ պետք է դա իրականացնել ներգաղթի շնորհիվ, թե ինչպես, ինչ ծրագրով, նախագահը չի ասում։ Եւ դժվար էլ ասի, որովհետեւ ներգաղթ կազմակերպելուց առաջ նախ պետք է կանխել արտագաղթը, իսկ իշխանությունների քաղաքականությունը ճիշտ հակառակին է նպաստում։ Ի վերջո, բնականոն ներգաղթի շանս էր առաջացել ի դեմս սիրիահայերի վերադարձի, սակայն իշխանությունն այդ շանսն էլ բաց թողեց նրանց նկատմամբ իր ագահ վերաբերմունքով։ Հետաքրքիր է՝ ում համար է կեղծ և իրական Սերժ Սարգսյանը: Անի Սահակյան