«Հանուն գիտության զարգացման» անդամների՝ հացադուլ սկսելու որոշումը կապրիզի է նմանվում.Արտակ Զաքարյան
«Չեմ հասկանում «Զինվորական ծառայության և զինծառայողի կարգավիճակի մասին» օրենքին դեմ դուրս եկած երիտասարդների՝ բանակցությունների դադարեցման տրամաբանությունը: Պաշտպանության նախարարի հետ հանդիպման ժամանակ հստակ պայմանավորվածություն է ձեռք բերվել, որ երիտասարդները կներկայացնեն հստակ առաջարկներ: Պաշտպանության նախարարի առաջին տեղալի խոսքերով, սակայն, նման առաջարկներ չեն ստացվել: Խնդրել ենք, որ այս շաբաթվա ընթացքում ներկայացվեն առաջարկություններ, համաձայն որի՝ հնարավորություն լինի հստակ սահմանել գիտության և կրթության ոլորտում նշանակալի ձեռքբերումներ, ընդգծված տաղանդ ունեցող երիտասարդների տարկետում տալը: Հիմա ինձ համար տարօրինակ է, որ այդ հնարավորությունները, ինչի համար երիտասարդները պայքարել են, հիմա չեն ցանկանում կիրառել:Չեմ հասկանում նաև հացադուլի իմաստը»,- ասաց պաշտպանության նախարարի առաջին տեղալ Արտակ Զաքարյանն այսօր ԱԺ-ում լրագրողների հետ հանդիպման ժամանակ: Զաքարյանի խոսքով՝ նա չի հասկանում հացադուլի իմաստը, քանի որ համակարծիք չէ այն հայտարարությանը, որ պահանջները չեն կատարվել, քանի որ Պաշտպանության նախարարությունը սպասում է երիտասարդների առաջարկների: Պաշտպանության նախարարի առաջին տեղակալը նաև հիշեցրեց, որ մինչ այս օրենքին դեմ դուրս եկած երիտասարդները 2 առաջարկ են ներկայացրել, որոնցից մեկը՝ բանակը կրթություն բերելը, հնարավոր չէ կիրառել, քանի որ դա կարող է խաթարել և՛ բանակը, և՛ կրթությունը: Իսկ ինչ վերաբերում է առաջարկներին, որ հստակ պետք են լինի չափորոշիչները, թե ինչ է նշանակում կրթության գիտության ոլորտում առանձնակի հաջողություններ ունենալը, Զաքարյանը շեշտեց, որ ընդունել են և քննարկում են: «Գիտեք՝ այս ամենը մի տեսակ կապրիզի է նմանվում, քանի որ մենք հստակ բացատրել ենք, որ տարկետման իրավունքը չի վերանում, և, նույնիսկ, ավելի է ընդլայնվում, քան նախկինում էր գործում՝ «Պատվի ունեմ» ծրագրի շրջանակում»,- ընդգծեց Արտակ Զաքարյանը՝ հավելելով, որ անկախ երիտասարդների գործողություններից, ամեն ինչ անելու են, որ Կառավարության կողմից տրվող տարկետման հնարավորության չափորոշիչը հստակեցվեն:
Հետևեք մեզ Viber-ում
