Ինքնասպանության փորձ կատարած ՔՊ-ականի զարմիկը հոգեկան առողջության կենտրոնում է գրանցված

Գյումրեցի իրավապաշտպան Կարապետ Պողոսյանը Oragir.News-ի հետ զրույցում հայտնել է, որ երեկ Գյումրիում ՔՊ-ականի զարմիկն ինքնասպանության փորձ է արել։

Կարապետ Պողոսյանի հայտարարության վերաբերյալ Oragir.News-ը փորձեց մեկնաբանություն ստանալ Գյումրիի ոստիականության Մուշի բաժնի պետ Ալեքսան Նորսոյանից. «Ճշտելու բաները լրատվականից ճշտեք, ես ձեր հարցերին չեմ կարող պատասխանել»։

ՆԳՆ-ի մամուլի բաժնից էլ հորդորեցին դիմել Քննչական կոմիտե։ «Մեզ մոտ ստացվել են նյութեր, նախաձեռնվել է քրեական վարույթ, այլ մանրամասնություն չկա։ Անձը հոգեկան առողջության կենտրոնում է գրանցված»,- հայտնեցին Քննչական կոմիտեից։

Oragir.News-ի տեղեկություններով` ինքնասպանության փորձ կատարած 14-ամյա տղան ՔՊ-ական պատգամավոր Կարեն Սարուխանյանի զարմիկն է (քրոջ որդին)։

Oragir.News-ը փորձեց պարզաբանում ստանալ ՔՊ-ական պատգամավոր Կարեն Սարուխանյանից։ Պատգամավորը նշեց, որ այսօր հարցազրույց չի տալիս։

«Զանգեք, կպայմանավորվենք...ես Գյումրիում եմ, միայն ԱԺ նիստի օրերին եմ Երևանում լինում»,- հայտարարեց Սարուխանյանը։

Նշենք, որ ամիսներ առաջ ՔՊ-ական պատգամավորը սկանդալային պատմությունների մեջ էր հայտնվել։ Փրայմերիզին ընդառաջ Նիկոլ Փաշինյանը Կարեն Սարուխանյանին ուղարկել էր արյան անալիզ հանձնելու` արյան մեջ թմրանյութի առկայությունը ստուգելու համար։

ՔՊ-ական քաղաքապետի թեկնածուի թեստի արդյունքը եղել է դրական, հետո Սարուխանյանը մի կերպ դուրս եկավ իրավիճակից։

Նշենք նաև, որ այդ ժամանակահատվածում ձերբակալվել էին ՔՊ-ական պատգամավոր Կարեն Սարուխանյանի քեռու որդին ու ՔՊ-ական ավագանու անդամը։

Նշենք նաև, որ Կարեն Սարուխանյանի քեռին Մանվել Խոջումյանն էլ, ով զբաղեցրել է Բյուրակնի միջնակարգ դպրոցի փոխտնօրենի պաշտոնը, նրան մեղադրանք էր առաջադրվել տնայնագործական եղանակով պատրաստված զգալի չափով՝ 6,64 գրամ «Մարիխուանա» տեսակի թմրամիջոց ապօրինի ձեռք բերելու և պահելու, ինչպես նաեւ գործի բազմակողմանի և օբյեկտիվ քննությանը խոչընդոտելու նպատակով քննիչի գործողություններին միջամտելու համար:

Բյուրակնի դպրոցի դաստիարակչական գծով փոխտնօրեն, ֆիզկուլտուրայի ուսուցիչ Մանվել Խոջումյանին տնօրեն Լուսինե Մելիքյանն աշխատանքից ազատել էր 2018 թ. մարտի 20-ին՝ մեղադրելով թմրամոլության մեջ: