Որքա՞ն գումար է տրամադրել Վաղարշապատի համայնքապետարանը երգիչներին՝ քաղաքի տոնին նվիրված համերգային ծրագրի համար

Վաղարշապատի համայնքապետարանը Ռեինկարնացիա խմբին տրամադրել է 13 միլիոն 810 հազար ՀՀ դրամ՝ 60 րոպե տևողությամբ համերգային ծրագրի համար՝ Վաղարշապատի Կոմիտասի անվան հրապարակում։ «Փաստինֆո»-ի հաղորդմամբ՝ այս գումարն ամրագրվել է կողմերի միջեւ ստորագրված պայմանագրում։

Հիշեցնենք, որ երեկ Էջմիածին քաղաքի 2710-ամյակն էր, որի ժամանակ եղել են նաև տոնակատարությունները, համերգային ծրագրեր։
Վաղարշապատի համայնքապետարանը պայմանագիր է կնքել նաև «Կրեատիվ դեկոր» ՍՊԸ-ի հետ և ըստ պայմանագրի վճարվել է 5 միլիոն 400 հազար դրամ, որպեսզի երեկոյի ընթացքում ելույթ ունենա նաև երգիչ Արամ MP3-ն։ Տեղեկացանք, որ վերը նշված գումարի դիմաց երգչի կատարումները տևել են 35-40 րոպե։

Նշենք, որ համայնքապետարանը պայմանագիր է կնքել նաև «Արտպրոգրես» մշակութային ՀԿ-ի հետ, որպեսզի քաղաքի 2710 ամյակին հնչի նաև ջազ երաժշտություն։ Ջազ համերգի համար վճարվել է 600.000 դրամ։

1 միլիոն 700 հազար դրամ էլ վճարվել է Արթուր Հարությունյան ԱՁ-ին, որպեսզի տոնական համերգի շրջանակում ելույթ ունենա նաև «Էթնո քոլորս» խումբը։

Ընդհանուր առմամբ 3 խմբերի և 1 արտիստի վճարվել է վճարվել է 20 միլիոն 810 հազար դրամ։