Դուք պաշտպանական իրավունքը խեղկատակության եք վերածել. Հայկ Ալումյան

Մարաշի զինված խմբի գործում այսօր որպես ամբաստանյալ Հարություն Սարիբեկյանի պաշտպան ներգրավված փաստաբան Նարինե Ռշտունին հայտարարեց, որ իր պաշտպանյալը երկու օր հացադուլի ու ջրադուլի մեջ է՝ այդպիսով բողոքելով իր նկատմամբ անարդարության դեմ: Պաշտպանը ստվարածավալ՝ 37 հատոր կազմող, գործի նյութերին ծանոթանալու համար 40 աշխատանքային օր ժամանակ խնդրեց: Սակայն դատարանը հայտնեց, որ այդքան ժամանակ չի կարող տրամադրել, հայտնեց, որ մեկ շաբաթ է տրամադրում պաշտպանին գործի նյութերին ծանոթանալու համար: Գործով ամբաստանյալ, ՀՀ նախկին փոխվարչապետ, Պաշտպանության ՀՀ նախկին փոխնախարար Վահան Շիրխանյանի պաշտպան Հայկ Ալումյանը հայտարարեց, որ այդ ժամկետը բավարար չէ գործի նյութերին ծանոթանալու համար, որ մեկշաբաթյա ժամկետում անգամ հնարավոր չէ մեղադրական եզրակացությանը ծանոթանալ: Հայկ Ալումյանն ընդգծեց՝ ծանոթանալը սոսկ գործը կարդալը չէ: «Առհասարակ ՝ ինչ է նշանակում «այս պաշտպանը չեկավ, եկեք նրան փոխարինենք ուրիշ պաշտպանով ու նիստը շարունակենք» արտահայտությունը։  Դուք պաշտպանության իրավունքը վերածել եք խեղկատակության: Եթե մենք ձևականորեն ենք այստեղ եկել, ապա ես այս ներկայացմանը չեմ պատրաստվում մասնակցել, իսկ եթե մենք եկել ենք իրական պաշտպանություն իրականացնելու, ուրեմն պիտի այս մարդկանց հնարավորություն տրվի ամբողջությամբ և մանրամասն ծանոթանալ գործի նյութերին»,- դատարանին դիմելով՝ ասաց Հայկ Ալումյանը։