Գերմանիայում Բունդեսթագի՝ Հայոց ցեղասպանությունը ճանաչող օրինագծի դեմ ազգայնական ցույցերի հովանավորը հայտնի է

Ինչպես տեղեկացնում է գերմանական Deutsche Welle հեռուստառադիոընկերությունը, Թուրքիայի իշխող «Արդարություն և զարգացում» կուսակցության անդամ Մեթին Քյուլյունքն աջակցել ու ֆինանսավորել է Գերմանիայի հետախուզական մարմինների ուշադրության կենտրոնում հայտնված «Օսմանցի գերմանացիներ» խմբավորմանը և վճարել նրանց նաև Բունդեսթագի կողմից Հայոց ցեղասպանությունը ճանաչող ու դատապարտող օրինագծի ընդունումից հետո Գերմանիայում հակահայկական ցույցերի կազմակերպման համար: Թուրք քաղաքական գործչի ու Գերմանիայում գործող թուրքական հանցավոր խմբավորման կապը ջրի երես է դուրս եկել գերմանական ոստիկանության կողմից խմբավորման մի շարք անդամների հեռախոսազրույցները լսելուց հետո: Բացի 2016 թվականի հունիսի 2-ին Հայոց ցեղասպանության մասին օրինագծի ընդունման դեմ կազմակերպված ցույցից, Քյուլյունքի տրամադրած դրամական միջոցներով «Օսմանցի գերմանացիները» ձեռք են բերել Skorpion տեսակի զենք՝ նույն թվականի մայիսին, ինչպես նաև նույն անձի ուղղորդմամբ զբաղվել են Գերմանիայում Թուրքիայի նախագահ Ռեջեփ Թայիփ Էրդողանի՝ Թուրքիայի քաղաքացի հանդիսացող ընդդիմախոսների հետապնդումներով: