Լավ ցանկություն է. Սերժ Սարգսյանը՝ Կարապետյանի 2018-ից հետո վարչապետ լինելու մասին
«Արմենիա» հ/ը-ը տված հարցազրույցում նախագահ Սերժ Սարգսյանն անդրադառնալով 2018 թվականի իր քայլերին նշել, որ, երբ գա ժամանակը՝ բոլորն էլ կիմանան, թե ինչ է լինելու. «Վերջ ի վերջո որևէ մեկը ինձ չի պարտադրել մասնակցել նախագահական ընտրություններին և դառնալ նախագահ։ Իսկ եթե ես կամովին եմ ստանձնել, պատրաստ պետք է լինեմ, և իրոք պատրաստ եմ մինչև վերջին վայրկյանը կատարել իմ պարտականությունները։ Սրանից հետո կտեսնեք, թե ես ինչ ոլորտում եւ ինչքան կարող եմ օգտակար լինել: Ես սա ասում եմ անկեղծ եւ չեմ ձևացնում: Ինչպես կորոշենք բոլորս միասին, այնպես էլ կշարժվենք առաջ»: ՀՀԿ-ն ՀՅԴ-ի հետ կոալիցիոն հուշագիր ունի եւ որոշումներ միասին են կատարելու: Հարցին , թե գործող վարչապետ Կարեն Կարապետյանը իր հարցազրույցներում հայտնել է, որ պատրաստ է 2018 թվականից հետո էլ զբաղեցնել վարչապետի պաշտոնը, Սերժ Սարգսյանը դա Կարեն Կարապետյանի կողմից «շատ լավ ցանկություն է» որակել: «Կարեն Կարապետյանը որպես վարչապետ, որպես մարդ մեզ համար ընդունելի և օգտակար անձնավորություն է, ինչպես ինձ, այնպես էլ ՀՀԿ-ի համար: Կգա ժամանակը եւ մենք կհայտարարենք մեր որոշման մասին: Այստեղ ոչ մի բան փնտրել պետք չէ: Ինչ վերաբերում է Կարեն Կարապետյանի ցանկությանը, շատ լավ, առողջ, տրամաբանված ցանկություն է»,- նշել է Սարգսյանը:
Հետևեք մեզ Viber-ում
