Լավ լուր անազատության մեջ որոշ գտնվողների համար

Կառավարությունը փոփոխություն և լրացումներ կատարեց նախկինում ընդունած որոշման մեջ՝ անազատության մեջ գտնվող անձանց կապն ընտանիքի և արտաքին աշխարհի հետ պահպանելու համար լրացուցիչ հնարավորություններ ստեղծվելու նպատակով: Օտարերկրյա կալանավորված անձանց կամ դատապարտյալներին կտրամադրվի ամսվա ընթացքում երկու անգամ մինչեւ 20 րոպե տևողությամբ տեսազանգից օգտվելու հնարավորություն: Այս մասին տեղեկանում ենք կառավարության նիստի օրակարգից: Դրա հնարավորությունը կալանավորված անձանց կընձեռվի եկող տարվա նոյեմբերի 1-ից: Տեսազանգը կարող է տեղի ունենալ վարչակազմի ներկայացուցչի ներկայությամբ՝ այդ մասին նախապես տեղյակ պահելով կալանավորված անձին կամ դատապարտյալին: «Արդյունքում կպահպանվեն միջազգային բազմաթիվ փաստաթղթերի պահանջները: Ըստ այդմ, նախատեսվում է օտարերկրյա կալանավորված անձանց կամ դատապարտյալներին, որոնց մերձավոր ազգականները չեն կարող տեսակցել նրանց, ինչպես նաև այն կալանավորված անձանց կամ դատապարտյալներին, որոնց մերձավոր ազգականները չեն կարող օգտվել կարճատև տեսակցությունից, տրամադրել ամսվա ընթացքում երկու անգամ մինչև քսան րոպե տևողությամբ տեսազանգից օգտվելու հնարավորություն»,- ասաց ՀՀ արդարադատության նախարար Դավիթ Հարությունյանը: