Զինված հարձակում են գործել տնային կալանքի տակ գտնվող անձի տան վրա․ մեկ անձ սպանվել է

«Փաստինֆո»-ի տեղեկություններով՝ Երևանում այսօր սպանված տղամարդը զինված փորձել է մուտք գործել տնային կալանքի տակ գտնվող անձի բնակարան, ինչի հետևանքով փոխհրաձգություն է տեղի ունեցել։

Հիշեցնենք, որ դեպքը տեղի է ունեցել այսօր՝ սեպտեմբերի 9-ի առավոտյան՝ Էրեբունի վարչական շրջանում։ Կրակոցների հետևանքով վիրավորում է ստացել մեկ տղամարդ, որը հիվանդանոց տեղափոխվելու ճանապարհին մահացել է։

«Փաստինֆո»-ին մանրամասներ են հայտնի դարձել դեպքից։ Մեր աղբյուրների փոխանցմամբ՝ տնային կալանքի տակ գտնվող անձի տան վրա երկու անձ զինված հարձակում է գործել, ինչի հետևանքով փոխհրաձգություն է տեղի ունեցել՝ տնային կալանքի տակ գտնվող անձի և նրա տուն մուտք գործել փորձող անձանց միջև։ Փոխհրաձգության հետևանքով զինված հարձակման մասնակիցներից մեկը հրազենային վիրավորում է ստացել և մահացել։

Նշենք, որ տնային կալանքի տակ գտնվող տղամարդն, ըստ լուրերի, մեղադրվում է սպանության մեջ։ Իրավապահները խուսափում են ասել՝ տեղի ունեցածը վենդետա է, թե ոչ, այսինքն՝ պատժի բացակայությունն է՞ պատճառ դարձել վրեժխնդրության, թե ոչ։

Քննչական կոմիտեից «Փաստինֆո»-ի հետ զրույցում հայտնեցին, որ դեպքի առթիվ նախաձեռնվել է քրեական վարույթ՝ Քրեական օրենսգրքի 44-155-րդ հոդվածի 2-րդ մասի 7-րդ և 8-րդ կետերով (սպանության փորձը՝ այլ անձանց կյանքի համար վտանգավոր եղանակով, մի խումբ անձանց կողմից), 155-րդ հոդվածի 1-ին մասով (սպանություն), 44-155-րդ հոդվածի 1-ին մասով (սպանության փորձ), 335-րդ հոդվածի 1-ին մասով (հրազենի, դրա հիմնական բաղկացուցիչ մասերի, ռազմամթերքի և այլ նյութերի, սարքերի, առարկաների ապօրինի շրջանառությունը)։

Նույն աղբյուրի փոխանցմամբ՝ մեկ անձ ձերբակալվել է, կատարվում է նախաքննություն։