Քաղաքական գլուխկոտրուկ․․․ Սելֆի՜ է, որ անում է

Փաշինյանը Չինաստան է գնացել ու սելֆի՜ է, որ անում է։ Չինաստանի, Ռուսաստանի, Թուրքիայի, Ադրբեջանի , Վիետնամի, Պաղեստինի, Բելառուսի, Մալդիվների, Ղրղզստանի նախագահների հետ «մի բաժակով ջուր է խմում»։ Դրանից առաջ էլ վաշինգտոնյան, եվրոպական սելֆիներով էր մեզ ողողել։

Դրանք դառնում են քաղաքական գլուխկոտրուկ. ի՞նչ է ուզում ասել սելֆիներով՝ «նայեք, ինչ շրջապատ ունե՞մ», ոչ մեկը չի՞ կարող ինձ «ձեռք տալ», թե՞ պարզապես դիտորդի կարգավիճակով հայտնիների հետ սելֆի է անում, ուրախանում․․․ Անկեղծ ասած, երկուսն էլ  հավանական են թվում, որովհետև որոշ հայտնիների հետ այնպես ինքնամոռա՜ց է նկարվում, որ ուզում ես հարցնել՝ հիմա դու եվրոպացի՞ ես, թե՝ ռուս։ Չեմ ասում հայ, որովհետև ազգային շահ չի ներկայացվում։ 

Իրականում Հայաստանի համար կարևոր չէ, թե որքան հայտնի մարդկանց հետ ես սելֆի անում։ Պետության ուժը կախված է ոչ թե լուսանկարներից, այլ հստակ քաղաքական քայլերից, արտաքին գործերում ազգային շահերի պաշտպանությունից ու անվտանգությունից։ Սելֆինները զվարճալի են, զվարճալի բառը իզուր չեմ օգտագործում,  բայց կարևոր է, որ դրանք չխանգարեն իրական արտաքին քաղաքականությանը: Հայաստանը չի արժևորվում լուսանկարներով։ Իրականում կարևոր չէ, թե ով քեզ հետ լուսանկարվեց, կարևոր է՝ դու ի՞նչ ես անում երկրի համար։ Սելֆիների էյֆորիա է, ուրիշ ոչինչ։ Ո՞րն է արդյունքը։ Եթե շարունակենք պարզապես լուսանկարների մեջ լինել, Հայաստանը կմնա դիտորդ համաշխարհային խաղերում՝ առանց իրական ազդեցության։ Երկրին անհրաժեշտ է ոչ թե սելֆիներդ, այլ գործնական արտաքին քաղաքականությունը, որն իսպառ բացակայում  ու անտեսվում է։

Հասմիկ Բաբաջանյան

«Հրապարակ օրաթերթ»