Կա՛մ ինչ-որ մազոխիզմով եք տառապում, կամ ամեն անգամ փորձում եք խաղի կանոնը հարմարեցնել ձեր ներքին խաղի կանոններին. ԲՀԿ-ականը՝ ՀՀԿ-ականին

ԱԺ-ում կառավարության հրավիրած արտահերթ նիստում Ֆինանսների նախարար Վարդան Արամյանը ներկայացրեց, թե ինչ փոփոխություններ են առաջարկում կատարել օրենքներում: Օրակարգում ներառված են «Շահութահարկի մասին», «Բյուջետային համակարգի մասին», «Բաժնետիրական ընկերությունների մասին», «ՀՀ քաղաքացիական օրենսգրքում» փոփոխություններ եւ լրացումներ կատարելու մասին նախագծերը: Որից հետո «Ելքի» պատգամավոր Էդմոն Մարուքյանը հարցրեց՝ նո՞ր է հիշել կառավարությունը այս օրենքները, ինչո՞ւ է միշտ դեկտեմբերի վերջին գալիս: Արամյանը պատասխանեց, որ բոլոր երկրներում էլ լինում են այսպիսի իրավիճակներ: Ի պատասխան Մարուքյանն ասաց, որ սա խորհրդարանական երկրի պրակտիկա չի. «Իբր թե խորհրդարանական երկիր ենք դառնում, պետք է հանգիստ քննարկենք օրենքները, առանց կարդալու խորհրդարանում դակվելու են օրենքները ու գնան: Կառավարությունը չպետք է վերջին պահին հիշի այս բաները»: «Ծառուկյան» խմբակցության պատգամավոր Նաիրա Զոհրաբյանն էլ նկատեց, որ երբ Հարկային փաթեթի քննարկման ժամանակ ասում էին՝ խնդրահարույց է փոփոխությունը, կառավարությունը չէր ուզում լսել: «Դուք մտածում էիք, որ մենակ դուք եք խելոք, մենակ դուք եք հասկանում, այստեղ նստած մարդիկ որեւէ բան չեն հասկանում: Բա որ էդքան խելոք էիք, ինչի՞ եք նորից բերում, օրենքն ուժի մեջ չմտած նորից փորձում խաղի կանոն փոխել: Կա՛մ ինչ-որ մազոխիզմով եք տառապում, կամ ամեն անգամ փորձում եք խաղի կանոնը հարմարեցնել ձեր ներքին խաղի կանոններին: Անընդունելի է արագացված ռեժիմով օրենքները այսպես փորձել դակել գնալ, որովհետեւ դահլիճում նստած մարդիկ ուղղակիորեն ձանձրանում են»,- հայտարարեց նա: