Սերժ Սարգսյանի հայտարարությունը իշխանության մնալու հայտ է. Արամ Սարգսյան
ԱԺ «Ելք» խմբակցության պատգամավոր Արամ Սարգսյանի կարծիքով Սերժ Սարգսյանի՝ $10 000 մեկ շնչին բաժին ընկնող ՀՆԱ-ի հասնելու հայտարարությունը իշխանության մնալու հայտ է: Սակայն նա իրատեսական չի համարում նախագահի այս հայտարարության իրագործումը: «Նման տնտեսություն ունենալու պայմաններում, երբ որ այն մոնոպոլիզացված է, ժամանակին էլ սա կոչվում էր կազմակերպված պետություն, դա պարզապես անհնարին է: Ես չեմ տեսնում, որ այսօրվա իշխանությունը ցանկություն ունի փոխվելու կամ քայլեր է անում փոփոխության համար: Հետևաբար՝ սա ասվել է ասելու համար: Գիտեք ինչ, երբ չի հայտարարվում, որ վարչապետ դառնալու մտադրություն չունեմ, սահմանադրական փոփոխություն արվեց պարզապես նրա համար, թե խորհրդարանական կառավարման համակարգն ավելի լավն է, սա արդեն բավարար հայտ է, որ նորից կփորձի մնալ որպես ՀՀ համար 1 դեմք»,- ասաց նա: Հիշեցնենք, որ ՀՀ Նախագահ Սարգսյանն իր ելույթում ասել էր. «Մի քանի տարի հետո մենք հասնելու ենք 10 հազար դոլարին համարժեք մեկ շնչի հաշվով ՀՆԱ-ի: Դա ենթադրում է նոր որակի ենթակառուցվածքներ և համայնքային ինստիտուտներ, ինչպես նաև ֆինանսավորման այլընտրանքային և նորարարական մոտեցումներ»:
Հետևեք մեզ Viber-ում
