Ես միջնորդել եմ Արենի համայնքի ղեկավարին ներելու հարցով. Սերգեյ Բագրատյան

Վայոց ձորի նախկին մարզպետ, ԱԺ «Ծառուկյան» խմբակցության պատգամավոր Սերգեյ Բագրատյանը լրագրողների հետ զրույցում խոստովանեց, որ ինքը ժամանակին դիմել է ՀՀ նախագահ Սերժ Սարգսյանին` գյուղապետերից մեկի համար: «Այդ ժամանակ նա թալանչի չի եղել, մեղավոր չի եղել: Ես միջնորդել եմ, որ Արենի համայնքի ղեկավարին ների, որովհետև նա անմեղ էր: Փորձում էին գործ հարուցել այդ գյուղապետի վրա, իբրև թե Արենի վարչական տարածքում գտնվող քարանձավը տրամադրել է սննդի ապօրինի օբյեկտի կառուցմանը»,- ասաց Բագրատյանը: Անդրադառնալով նախագահ Սերժ Սարգսյանի հայտարարությանը. «Նոր տարուց հետո՝ լինի մարզպետ, լինի նախարար կամ ինձ մոտ մարդ, չմիջնորդի որևէ համայնքապետի ներելու համար այդպիսի դեպքերում: Նորից եմ կրկնում` մենք պատրաստ ենք, եթե ինչ-որ դեպք է պատահել, որ մեզնից կախված չէ՝ դժբախտ պատահար և այլն, պատրաստ ենք ամեն ինչով օժանդակելու, բայց դիտավորյալ ձեռքերը կեղտոտելը մենք պատրաստ չենք այլևս հանդուրժել: Երևի առաջին անգամ եք ինձնից լսում այսպիսի խոսքեր, բայց իմ մոտեցումը միշտ այդպիսին է եղել», Բագրատյանն ասաց, որ իր դիմած ժամանակ Գլխավոր դատախազությունը քրեական գործ է հարուցած եղել, իսկ ինքը նախագահին դիմել է, որ անարդարությունը վերացվի. «Նախագահն էլ միջնորդել է, անարդարությունը վերացվել է, մարդը չի պատժվել չարած գործի համար»,- շարունակեց նա: Բագրատյանի խոսքով՝ իր մարզպետ եղած ժամանակ 3 անգամ դիմել է, որպեսզի անարդար վերաբերմունք չլինի 3 համայնքապետերի նկատմամբ: