Դաշնակցական գող գյուղապետեր կա՞ն

ԱԺ ՀՅԴ խմբակցության ղեկավար Արմեն Ռուստամյանը լրագրողների հետ ճեպազրույցում  անդրադառնալով Սերժ Սարգսյանի` ՏԻՄ-երի մասին հայտնի ելույթին նշեց. «Տարբեր համայնքներում տարբեր համայնքապետեր իրենց դիրքը չարաշահել են և այդ մասին է բարձրաձայնել նախագահը: Պետք է ոչ թե փորձեն հովանավորել այդպիսի համայնքապետերին մարզպետները, նախարարները, այլ պետք է վերահսկվի այս ամեն ինչը, ես նախագահի հայտարարությունը այդ ուղղությամբ եմ տեսնում: Սա էլ պետք է կատարվեն, կարգավորվեն ոչ թե հայտարարություններով, այլ գործողություններով:Նոր Սահմանադրությունը, նոր համակարգը հենց դրա համար է, որ նման երևություները բացառվեն»: «Եղել են ահազանգեր, որոնց մասին մենք բոլորս գիտենք, բայց դրանց հետևից գնացող չի եղել։ Նախագահն ասում է, որ այսուհետ գործընթացն իր հունով ընթանալու է», - ասաց ՀՅԴ-ական պատգամավորն ու ավելացրեց, որ Սերժ Սարգսյանը հայտարարել է, թե «ամոթ է», թալանելը, իսկ ամոթը Սահամանադրությամբ սահմանված պատիժ չէ: Ռուստամյանը նաեւ անդրադարձավ հարցին, արդյո՞ք ՀՅԴ-ական գող համայնքապետեր կան: Ես ոչինչ չեմ լսել դաշնակցական գող գյուղապետերի մասին: Եթե բացահայտենք, համապատասխան ձևով կարձագանքենք: «Եթե մարդուն ուզում ենք պատժել, այդ պատիժը պետք է լինի հիմնավոր: Քաղաքական հայտարարությունները մի բան է, ասել, որ դրանից հետևում է՝ այս ինչ մարդը պետք է պատժվի, դրանք տարբեր են»,- նշեց նա: Հիշեցնենք, որ Սերժ Սարգսյանն իր ելույթում նշել է. «Գաղտնիք չէ, որ շատ համայնքապետեր չարաշահում են իրենց պաշտոնը և այն օգտագործում են անհասկանալի և անընդունելի եկամուտներ ունենալու համար՝ սկսած նրանից, ո՛ր տարբեր խորամանկություններով, տարբեր ձևերով օտարում են համայնքներին պատկանող հողերը, ո՛ր անազնիվ վերաբերմունք են ցուցաբերում համայնքային բյուջեների նկատմամբ, և չմանրամասնեմ, որովհետև ինձ համար շատ տհաճ է այս խոսակցությունը: Մենք պատրաստ ենք, անկեղծ եմ ասում, պատրաստ ենք մեր աչքի լույսի պես ձեզ վերաբերվել, պատրաստ ենք մեր հնարավորությունների սահմանում օգնելու՝ լինի դա անձնական, թե համայնքային հարց, բայց մենք պատրաստ չենք տեսնելու, թե ձեզնից ոմանք ինչպես են մեր բնակչության փողերը տանում իրենց տուն: Ամո՛թ է»: