Ում էր ուղղված նախագահ Սարգսյանի հորդորը.բացահայտում է Ռուստամյանը
«Նախագահը, բնականաբար, պետք է ըստ գործող կարգի, քանի որ խորհրդարանական համակարգի մեջ չենք դեռևս ամբողջովին, բնականոն գործունեությանը հետևի, նրա հորդորն ուղղված էր նրան, որ ժամանակ առ ժամանակ բոլորը ձգված աշխատեն, սա այդ կոնտեքստի մեջ պետք է դիտարկել:Համայնքապետերի գործունեությանը վերաբերող կոնկրետ մեխանիզմներ կան, այս Սահմանադրությամբ դրանք ավելի են կարգավորվելու ու հստակեցվելու, պետք է գործեն մեխանիզմներ, բացառվեն նման երևույթները »,-այսօր Ազգային ժողովի ճեպազրույցների ժամին ասաց ՀՅԴ խմբակցության ղեկավար Արմեն Ռուստամյանը՝ խոսելով նախագահ Սարգսյանի՝ երկու օր առաջ ունեցած ելույթին համայնքապետերի վերաբերյալ: Նախագահի հայտարարությունը, թե գաղտնիք չէ, որ շատ համայնքապետեր չարաշահում են իրենց լիազորությունները, ժողովրդի փողը տանում տներ և այլն, և եթե լինի նման դեպք, ուրեմն, ամոթ է, կպատժվեն այսուհետ բավական խիստ, Ռուստամյանը նորություն չի համարում: Դիտարկմանը, թե ինչո՞ւ են այդ դեպքերը կոծկվել ու 2018-ից նոր պետք է դրանց դեմն առնել, Ռուստամյանն ասաց. «Եղել են նման մարդիկ ու չեն բռնվել, պատաճառները գիտենք, թե որտեղ են թացնված։ Եթե մենք ունենք արդարադատություն, որտեղ մեկ անձով է ամեն ինչ պայմանավորված, այդպես էլ պետք է լիներ։ Նման դրսևորումները նոր Հայաստանում չեն լինելու։ Համակարգն այնպիսին է լինելու, որ վերահսկողները շատ են լինելու, մի հոգի չի լինելու»։ Ռուստամյանն ընդգծեց, որ սա պարզապես հայտարարություն չէր, որը պետք է կյանքի կոչվի, ապա հավելեց, որ մշակվելիք գործառույթները թույլ կտան բացառել նման դրսևորումները։ Հարցին, թե եթե կան այդպիսի համայնքապետեր, ինչո՞ւ չունենք քրեական գործեր, պատգամավորը նշեց. «Նախագահը քրեական գործեր հարուցելու իրավասություն չունի, բայց նորմալ է, որ խոսի այս մասին։ Կարծում եմ՝ սա նախազգուշացում է բոլոր նրանց համար, ովքեր պետք է վեր հանեն այս դեպքերն ու իրավական հետաքննություն սկսվի»։ Ճշգրտող հարցին, թե արդյոք այս հայտարարությունից հետո իրավական մարմինները պետք է զբաղվեն այս հարցով, Ռուստամյանը նշեց. «Կարծում եմ՝ վաղուց պետք է զբաղվեին, եթե չեն զբաղվել, լավ չեն արել»։
Հետևեք մեզ Viber-ում
