Տպավորություն է` Սերժ Սարգսյանը տեղյակ չէ, որ Վանաձորում ՀՀԿ-ն չի հաղթել. Էդմոն Մարուքյան
ՀՀ ԱԺ Ելք խմբակցության պատգամավոր Էդմոն Մարուքյանը անդրադարձել է տեղական ինքնակառավարման եւ տարածքային կառավարման մարմիններին նվիրված խորհրդաժողովում Սերժ Սարգսյանի խոսքին, որտեղ նա նշել էր, որ մարզերում տեղական մակարդակի ընտրությունները չեն արժանանում այն ուշադրությանը, որին հիրավի արժանի են եւ բերում վարկածներ, թե ինչու է այդպես, խոստացել էր, որ 2040 թվականին երկիրը հասնելու է 10 հազար դոլարին համարժեք մեկ շնչի հաշվով համախառն ներքին արդյունքի, խոսել նաեւ այն մասին, որ գյուղական բնակավայրերում մարդկանց աղքատ լինելու հանգամանքը պայմանավորված է նրանց ոչ աշխատասիրությամբ ու անդրադարձել խոշորացված համայնքների կառավարման մի շարք այլ հարցերի: Ելույթի համառոտ տարբերակը մենք ներկայացրել ենք. Ելք խմբակցության պատգամավոր Էդմոն Մարուքյանի ֆեյսբուքյան գրառումն ու նախագահի խոսքի անդրադարձը` ստորեւ. «Ցավոք, տեղական մակարդակի ընտրությունները չեն արժանանում այն ուշադրությանը, որին հիրավի արժանի են: Գուցե այն պատճառով, որ այստեղ խնդիրները կոնկրետ են, իսկ այդ կոնկրետության, հստակ գործի տակ քչերն են ցանկանում մտնել: Միգուցե, նաև այն պատճառով, որ հայաստանյան քաղաքական ուժերը թույլ են ներկայացված համայնքային մակարդակում և համարում են, որ այդ ընտրությունները երկրորդական են, սակայն քաղաքականությունն առաջին հերթին հենց տեղական մակարդակում է:»֊ հատված ՀՀ նախագահ Սերժ Սարգսյանի ելույթից Այնպիսի տպավորություն է, որ Սերժ Սարգսյանը տեղյակ չէ, որ Վանաձորում համամասնական շատ բարդ ընտրապայքարի արդյունքում ՀՀԿ֊ն չի հաղթել, ինչպես նաև երևի չեն զեկուցել, որ Վանաձորում ՀՀԿ֊ն ՀՅԴ֊ի հետ միասին փոքրամասնություն են կազմել, որից հետո մանդատագողություն է տեղի ունեցել, որից հետո մի տարի հակասահմանադրական նիստեր են գումարվել, որից հետո ՍԴ֊ն հակասահմանադրական է ճանաչել այդ մեկ տարվա գործունեությունը, որից հետո ՀՀԿ֊ՀՅԴ կոալիցիային միացել է ՕԵԿ, որից հետո համայնքային ընտրություններին մասնակցելուց առաջ քաղաքական ուժերը մի քանի անգամ ավել են մտածում, որ արժե այս հակապետական, ավտորիտար մթնոլորտում մասնակցել ՏԻՄ ընտրություններին ու Նոյեմբերի 5֊ի ընտրությունները դրա լավագույն վկայությունը դարձան»:
Հետևեք մեզ Viber-ում
