Հիպնոսի սեանս

Սամվել Կարապետյանի Պաշտպանության խորհորդը գրում է․ «Հակակոռուպցիոն դատարանի այսօրվա անտրամաբանական վճիռը ցույց տվեց, որ Հայաստանում արդարադատություն չկա»։ Հայաստանում արդարադատություն չկա  այն ժամանակվանից, երբ երկիրը հայտնվել է պարտության ճահճի մեջ։ Պարտված երկրի ղեկավարը արդարությամբ, արդարադատությամբ  կարո՞ղ էր պահել իր իշխանությունը։ Հին խոսք է․ «Արդարությունը հաջողության հասածների գյուտն է»։ Պարտված, հաջողության չհասած երկրի ղեկավարից ի՞նչ արդարություն պահանջես։ Նա ամեն ինչ անելու է, որ չերևա պարտությունը, որ այն հաղթանակ թվա։ Հիշու՞մ եք Նիկոլ Փաշինյանի հոգեթերապևտիկ բուժումը․ «Եկեք պայմանավորվենք․ ինչ էլ լինի՝ մենք մեզ պարտված չենք ճանաչելու»։

Դա հիպնոսի սեանս  էր, որ մարդիկ իրենց պարտությունը ճանաչեն որպես հաղթանակ ու չհավատան պարտությանը։ Դա մարդկանց սթափ իրականությունից կտրելու նախապատրաստական քայլ էր։ Դրան հետևեց համապատասխան գործիքների գործադրում, որ ովքեր չհավատան  «իր հաղթանակին», հետապնդվելու, ձերբակալվելու են․․․ Տրամաբանականը հենց դա է։ Հակակոռուպցիոն դատարանը իշխանության համար տրամաբանական որոշում է կայացրել՝ երկարաձգելով Սամվել Կարապետյանի կալանքը։ Դա իշխանությունը , Նիկոլ Փաշինյանի աթոռը պահելու տրամաբանական քայլ էր։ Այդ քայլը ժողովրդի, փաստաբանների, ոչ մեկի համար անսպասելի չէր։ Սամվել Կարապետյանի պաշտպանության խորհրդին մի բան եմ ուզում հարցնել․ Սամվել Կարապետյանի կալանքը երկարաձգելո՞վ պարզվեց, որ արդարադատություն չկա։ Մինչ այդ եղած բոլոր փաստերը դա՞ չէին ապացուցել։

Հասմիկ Բաբաջանյան

«Հրապարակ օրաթերթ»