Առողջական խնդիրներով բանակ զորակոչված Ավետիք Մաթևոսյանը կրկնակի բուժզննում է անցել

Առողջական խնդիրներով բանակ զորակոչված 18-ամյա Ավետիք Մաթևոսյանն այսօր կրկնակի բուժզննում է անցել։ Այս մասին այսօր՝ օգոստոսի 12-ին, NEWS.am–ի հետ զրույցում ասաց նրա հայրը՝ նշելով, որ բուժզննման արդյունքները հայտնի կլինեն երկու օրվա ընթացքում։

Ընտանիքը Ավետիքին այցելել է հինգշաբթի օրը, իսկ այսօր նրա հետ հեռախոսազանգ է ունեցել։

Բարեկամների փոխանցմամբ՝ Մաթևոսյանի վիճակը վատթարանում է։

Ավելի վաղ հայտնել էինք, որ Ավետիք Մաթևոսյանի ծնողներն ահազանգում են՝ իրենց որդուն բանակ են զորակոչել՝ հաշվի չառնելով նրա առողջական խդնիրները։

«Դողը և էպիլեպտիկ նոպաները չեն անցնում։ Ամեն օր վիճակն ավելի վատանում է։ Շնչառությունը չի հերիքում, ընկնում է գետնին, անգիտակից է դառնում։ Արդեն անգամ ձայներ է լսում», – NEWS.am-ի հետ զրույցում ասել էր Ավետիքի մայրը։

Պաշտպանության նախարարությունից NEWS.am–ին հայտնել էին, որ Ավետիքը դեղորայքային բուժում է ստանում, հոսպիտալում նրա վիճակի կլինիկական դիտարկում է իրականացվում։

Նախարարությունից նշել են՝ հետազոտությունների արդյունքներից կախված՝ կարող է քննարկվել Ավետիքի առողջական վիճակի պատճառով վաղաժամկետ զորացրման հնարավորությունը։