Պարտադիր պիտի երկիրը փուռը տայիր, որ «խաղաղարա՞ր» դառնայիր

Փաշինյանն իր ֆեյսբուքյան էջում գրում է․ «Երանի՜ խաղաղարարներին, որովհետեւ նրանք Աստծու որդիներ պիտի կոչուեն» Մատթ. 5.9։ Նրան քաղաքական պատասխան տալ պետք չէ, որովհետև ապրում ենք մի շրջանում, երբ քաղաքականությունն արդեն անզոր է։ Այն խժռող գայլի պես լափել է մարդկանց հույսերը, երազանքները, սպասումները։ Եվ քաղաքական հոտ զգալուց մարդիկ չարանում են, չեն ուզում լսել, ընդունել։ Ուշադրություն դարձրեք՝ քաղաքական ո՞ր գնահատականն է մարդկանց կողմից արժանանում դրական արձագանքի։ Քաղաքական գործչի՞, թե շարքային քաղաքացու։ Միօրինակ քաղաքական գնահատականներն արդեն սպառել են իրենց․ մարդիկ սպասում են իրենցից մեկի անկեղծ խոսքին։ Դա լավ է հասկանում Փաշինյանն ու երկիրը աշխարհաքաղաքաղաքական զոհասեղանին դնելուց առաջ Աստվածաշնչից մեջբերումներ է անում։ Այնպիսի մեջբերումներ, որոնցից քաղաքական հոտ չգա, որոնք համահունչ լինել մարդկանց հույզերին։ Մարդկանց խաղաղ ապրելու զգացումը Փաշինյանն ամբողջացնում է Աստծո խոսքով․ «Երանի՜ խաղաղարարներին, որովհետեւ նրանք Աստծու որդիներ պիտի կոչուեն»։ Նրան պատասխանում են շարքային քաղաքացիները․ «Պարտադիր պիտի տաս հազարից ավելի հայորդիների փուռը տայիր, որ «խաղաղարա՞ր» դառնայիր… 150 հազար հայի անտուն թողներիր, որ խաղաղարա՞ր դառնայիր»։ Սա թումանյանական տողերն է հիշեցնում․ Երազումըս մի մաքի Մոտըս եկավ հարցմունքի. ― Աստված պահի քո որդին, Ո՞նց էր համը իմ ձագի… Հայ ժողովրդին մաքի՞ ես սարքել, որ Ալիևին պիտի հարցնի՝ ո՞նց էր համը իմ ձագի։ Ո՞նց էր համը Արցախի, հայկական տների, վանքերի, եկեղեցիների, արյան․․․ Մեր տղե՞րքն էին խանգարում, որ խաղաղարար դառնաս։ Մարդիկ իրենց վիրավորված են զգում, երբ Փաշինյանն օգտագործում է Աստվածաշունչը, ահա թե ինչ են գրում հենց իր էջում․ «Բավական է Աստվածաշունչն օգտագործես քո ազգադավ ծրագրերի համար։ Արդեն 7 տարի է Հայաստանի ողջ ժողովրդին ներքին պատերազմ ես հայտարարել։ Դու ու՞ր, խաղաղարար լինելն ուր։ Գիտենք, որ մինչև վերջ ստերով փորձելու ես մանիպուլացնել ժողովրդին, բայց ժողովրդի համբերության բաժակը լցվել է։ Այսօր կտեսնենք ինչ ասել է քո այդ խաղաղությունը», «Նմանատիպ գրառում էլի էիր արել, եթե չեմ սխալվում, Արցախի հայաթափման ժամանակ, հիմա ի՞նչ կա մտքիդ։ Ի դեպ Արցախի հայաթափումից առաջ ձեր տիկինը գիրք էր կարդում, հագին էլ մի շապիկ՝ վրան փախստականների վերաբերյալ հետաքրքիր գրվածքով, հիմա էլ Էրդողանի գիրքն ա որոշել կարդա»։ Սրանք քաղաքական գնահատականներ չեն, համոզմունք է, որ մարդիկ ձեռք են բերել Փաշինյանի դժնդակ իշխանության օրոք։

Հասմիկ Բաբաջանյան

«Հրապարակ օրաթերթ»