Մեկ տարում կորցրել է չորս միլիարդ դոլար

Microsoft ընկերության հիմնադիր Բիլ Գեյթսի կարողությունը մեկ տարում նվազել է 4 միլիարդ դոլարով հասնելով 75 միլիարդի, հայտնում է Forbes պարբերականը: Չնայած դրան, Բիլ Գեյթսը հերթական անգամ հարուստների համաշխարհային վարկանիշում զբաղեցրել է առաջին հորիզոնականը: Երկրորդ տեղում է իսպանացի միլիարդատեր, Inditex ընկերության (հագուստների Zara, Massimo Dutti բրենդներ) հիմնադիր Ամանսիո Օրտեգան` 64․5 միլիարդ դոլար կարողությամբ: Հայտնի ամերիկացի ներդրող Ուորեն Բաֆեթը պահպանել է իր երրորդ տեղը: 85-ամյա գործարարն ունի 60․8 միլիարդ դոլար կարողություն: Չորրորդ և հինգերորդ տեղերը զբաղեցրել են մեքսիկացի Կառլոս Սլիմ Էդը (50 միլիարդ դոլար) և Amazon.com-ի հիմնադիրը Ջեֆ Բեզոսը (45․2 միլիարդ դոլար): Facebook-ի հիմնադիր Մարկ Ցուկերբերգը մեկ տարվա ընթացքում 10-րդ տեղից բարձրացել է վեցերորդ տեղը` 44․6 միլիարդ դոլար կարողությամբ: Միլիարդատերերի տասնյակում տեղ են գտել նաև Oracle-ի հիմնադիր, 71-ամյա Լարի Էլիսոնը, Bloomberg-ի գլխավոր տնօրեն Մայքլ Բլումբերգը և Koch Industries կորպորացիայի տերերը` Չարլզ և Դևիդ Կոխ եղբայրները: