Արտակարգ դեպք՝ Սևանում

Այսօր՝ օգոստոսի 5-ին, արտակարգ դեպք է տեղի ունեցել Գեղարքունիքի մարզում: Ժամը 13:30-ի սահմաններում ՀՀ ներքին գործերի նախարարության փրկարար ծառայության 9-11 ճգնաժամային կառավարման ազգային կենտրոն ահազանգ է ստացվել , որ Շորժա-Դրախտիկ հատվածում գործող ընտանեկան հանգստի լողափից Սևանա լճի ափից ջրային ներքնակով 6 քաղաքացի, որոնցից մեկը՝ երեխա, առաջացած քամու պատճառով հեռացել են և գտնվում են անօգնական վիճակում և չեն կարողանում վերադառնալ ափ:
Այս մասին հայտնում են shamshyan.com-ից։

 Ջրային պարեկներն ու փրկարարները սկուտերներով ափից մոտ 2.5 կմ հասել են անօգնական վիճակում հայտնված քաղաքացիներին և կարողացել են նրանց անվտանգ մոտեցնել ափին:

Ֆոտոլրագրողի տեղեկություններով՝ եթե փրկարարներն ու ջրային պարեկները օպերատիվ չգործեին, ապա քամին էլ ավելի կհեռացներ այդ անձանց ափից, և հնարավոր է՝ շրջվեին ու հայնտվեին լճում, ինչը ողբերգական ավարտ կարող էր ունենալ:

Դեպքի վայր են ժամանել ՀՀ ՆԳՆ ոստիկանության պարեկային ծառայության Գեղարքունիքի մարզի գումարտակի հրամանատար Ալբերտ Մարտիրոսյանն ու գումարտակի ծառայության ավագ տեսուչ Բակուր Սարիբեկյանը:

SHAMSHYAN.com-ի թղթակցի հետ զրույցում փրկված քաղաքացիների հարազատները, ովքեր հրաժարվեցին տեսախցիկի առաջ խոսել, ասում էին.

«Առաջին հերթին շնորհակալություն ու էլի շնորհակալություն փրկարարներին ու ջրային պարեկներին, եթե նրանք մի փոքր ուշանային, երևի արդեն ջրասուզակներով էդ մարդկանց մարմիններն էինք ման գալու, բայց հալալ ա տղերքին, առանց չափազանցության դժոխքից մեր հարազատներին դուրս բերեցին, Դրախտիկից էին մտել լիճ ու քամին շատ արագ նրանց հեռացրեց ափից, մենք էլ ժամանակին ահազանգեցինք փրկարար ծառայություն, ու «9-11»-ն էլ շատ օպերատիվ գործեց: Կրկին շնորհակալություն ենք հայտնում փրկարարներին ու ջրային պարեկներին:

Ֆոտոլրագրողի տեղեկություններով՝ փրկվածներն են Մարիամ Կ.-ն, Տաթև Խ.-ն, Արփի Շ.-ն, 4 տարեկան Արսեն Շ.-ն, Աղաջան Գ.-ն և ևս 1 տղամարդ, ում ինքնությունը պարզվում է:

Փրկարարներին ու ջրային պարեկներին չի հաջողվել ջրային ներքնակը դուրս բերել և բոլորը ափ են տեղափոխվել սկուտերներով: