Երևանում հայտնաբերվել է մոտոցիկլ, որի վրա առկա են արնանման հետքեր, կողքին՝ գարեջրի շշեր

Այսօր՝ օգոստոսի 3-ին, առեղծվածային դեպք է տեղի ունեցել Երևանում: Ժամը 12:20-ի սահմաններում ՀՀ ներքին գործերի նախարարության ոստիկանության պարեկային ծառայության Երևան քաղաքի գնդի 4-րդ գումարտակում օպերատիվ տեղեկություններ են ստացվել, որ Ամառանոցային փողոցից դեպի Սարալանջի հին ճանապարհ ընթացող Տերյան փողոցի հատվածում մոտոցիկլ է ընկած և կա վիրավոր քաղաքացի: Այս մասին հայտնում է Shamshyan.com-ը։

Դեպքի վայր են ժամանել ՀՀ ՆԳՆ ՊԾ Երևան քաղաքի գնդի 4-րդ գումարտակի 3-րդ վաշտի պարեկները՝ գումարտակի հրամանատար Արսեն Ստեփանյանի, գումարտակի հրամանատարի տեղակալ Ալբերտ Հովհաննիսյանի, վաշտի հրամանատար Ալյոշա Այվազյանի և վաշտի հրամանատարի տեղակալ Ռաֆիկ Պռազյանի գլխավորությամբ:

Տեղում պարզվել է, որ տեղեկությունը հավաստի է և նշված վայրից Հերացու անվան թիվ 1 համալսարանական հիվանդանոց է տեղափոխվել մի երիտասարդ տղա՝ մարմնական վնասվածքներով: Տարածքը սահմանազատել են նույն վաշտի ավագ պարեկ Ռոման Խաչատրյանն ու կրտսեր պարեկ Արման Հակոբյանը:

Դեպքի վայր են ժամանել ՀՀ ՆԳՆ ոստիկանության համայնքային ոստիկանության գլխավոր վարչության Արաբկիրի բաժնի պետ Ռուբեն Ներսիսյանն ու բաժնի պետի տեղակալ Սերգեյ Մամիկոնյանը: Ոստիկաններն ու պարեկները նշված վայրում հայտնաբերել են «Yamaha» տեսակի մոտոցիկլ, որի վրա և ասֆալտին հայտնաբերել են արնանման հետքեր, գարեջրի բացած 3 շիշ՝ ամբողջությամբ դատարկ և 1 շիշ՝ մասամբ դատարկ:

Դեպքի մասին ոստիկանության Արաբկիրի բաժնից տեղեկությունը փոխանցել են ՀՀ քննչական կոմիտեի Երևան քաղաքի քննչական վարչության Արաբկիրի քննչական բաժին, որտեղից ժամանել է քննչական խումբը՝ օրվա պատասխանատու հերթապահ քննիչի գլխավորությամբ:

Դեպքի փաստով քննչական բաժնում նախաձեռնվել է քրեական վարույթ, որտեղ էլ պարզվում է մոտոցիկլավարի սեփականատիրոջ, մոտոցիկլավարի և հիվանդանոց տեղափոխված քաղաքացու ինքնությունը: Գ. Շամշյանի տեղեկություններով՝ մոտոցիկլավարը եղել է Երևանի բնակիչ 37-ամյա Ռ. Ն.-ն: Ոստիկանությունն ու քննչական բաժինը պարզում են նաև՝ արդյոք նա վիճաբանության, ինքնավնասման թե ընկնելու հետևանքով է մարմնական վնասվածք ստացել: