Ինչու է հայկական պատվիրակությունը Մոսկվայում ինքնաթիռ նստել՝ անցնելով ընդհանուր ընթացակարգով
ԱԺ հասարակայնության և տեղեկատվության միջոցների հետ կապերի վարչության պետ Արսեն Բաբայանը ֆեյսբուքյան իր էջում մեկնաբանել է մամուլի հրապարակումներն այն մասին, որ Մոսկվայի օդանավակայաններից մեկում հայ պատգամավորները, այդ թվում ԱԺ նախագահ Արա Բաբլոյանը, ինքնաթիռ են նստել՝ անցնելով ընդհանուր ընթացակարգով։ «Հարգելի գործընկերներ, Անհրաժեշտ եմ համարում անդրադառնալ ՀՀ ԱԺ նախագահի գլխավորած պատվիրակության` Դուշանբե-Մոսկվա-Երևան երթուղուն, որի մասին վերջին օրերին տարբեր մեկնաբանություններ են հնչում: Դուշանբեից Երևան վերադարձի չվացուցակի համաձայն` պատվիրակությունն օդանավակայանում Մոսկվա-Երևան թռիչքին հասնելու համար ուներ 1 ժամ 25 րոպե: Մինչդեռ, Դուշանբե-Մոսկվա չվերթը չվացուցակում 1 ժամ ուշացում գրանցեց:
Ելնելով իրավիճակից՝ հաջորդ չվերթից չուշանալու համար, ՀՀ ԱԺ նախագահն անձամբ է որոշել Մոսկվա-Երևան ինքնաթիռին հասնել ընդհանուր ընթացակարգով, քանի որ մնացել էր ընդամենը 25 րոպե. եթե հատուկ արարողակարգային ընթացակարգով կազմակերպվեր, այն կտևեր առնվազն 1 ժամ, և պատվիրակությունը չէր հասցնի այդ օրը վերադառնալ Երևան:
Դուշանբեից կապ է հաստատվել տաջիկական ավիաընկերության մոսկովյան ներկայացուցչի հետ, որն արդեն Մոսկվայում դիմավորել է պատվիրակությանն ու արագ ուղեկցել դեպի Մոսկվա-Երևան ինքնաթիռը:
Ընդհանուր ընթացակարգի համաձայն` պատվիրակության բոլոր անդամները, այդ թվում՝ ԱԺ նախագահը, հաշվառվել են, անցել են մետաղաորսիչ սարքով և մոտեցել նստեցման:
Պատվիրակության որևէ անդամի, այդ թվում նաև՝ ՀՀ ԱԺ նախագահին, որևէ մեկը չի խուզարկել:
Հ.Գ. Սա առաջին դեպքը չէ, երբ ուղևորութունների ժամանակ ՀՀ ԱԺ նախագահ Արա Բաբլոյանը հաշվառումը և ինքնաթիռ նստելը ընդհանուր ընթացակարգով անցնելու որոշում է կայացնում: Արա Բաբլոյանի համար սա հնարավորություն է նաև անձամբ տեսնելու, թե այլ պետություններում ինչպես են սպասարկում մեր հայրենակիցներին: Ի դեպ, ՀՀ ԱԺ նախագահ Արա Բաբլոյանին հաճախ կարելի է տեսնել մեքենա վարելիս, խանութում գնումներ կատարելիս կամ, պարզապես, զբոսնելիս»:
Հետևեք մեզ Viber-ում
