Չարենցավանում եկեղեցու դեմ ՔՊ-ի ակցիային մասնակցել է ընդամենը 30 հոգի

«Փաստինֆոն» նախօրեին անդրադարձել է Արարատ քաղաքում գտնվող նախկին կինոթատրոնի շենքի շուրջ «Քաղաքացիական պայմանագրի» քարոզչամեքենայի բարձրացրած աղմուկին և այս առնչությամբ Մասյացոտնի թեմի առաջնորդարանի դիվանապետի պարզաբանմանը։ Այնուհետեւ շրջանառության մեջ դրվեց Վաղարշապատում այգու անմխիթար վիճակի վերաբերյալ տեսանյութ, որի շարունակությունն արդեն Կոտայքում էր։ Եկեղեցու դեմ քարոզչական արշավը ՔՊ-ն այսօր տեղափոխել էր Չարենցավան՝ բարձրացնելով կինոյի շենքի հարցը։ Այն Կոտայքի թեմի սեփականությունն է, իսկ ՔՊ-ն հավաք էր կազմակերպել՝ կինոյի շենքի վերցնելու պահանջով։

Ակցիան կազմակերպել էր Չարենցավան համայնքի «Քաղաքացիական պայմանագիր» խմբակցությունը։ Թե ինչու են չարենցավանցի ՔՊ-ականները հատկապես հիմա հիշել դեռ 2000-ականների սկզբին Մայր Աթոռի կողմից օտարված շենքի մասին, թերևս լրացուցիչ պարզաբանման կարիք չկա։ Հատկանշական է, սակայն, որ, ինչպես «Փաստինֆոյի» հետ զրույցում հայտնեց Չարենցավանի բնակիչ Գևորգ Հակոբյանը, ակցիային մասնակցում էին մոտ 30 հոգի, որի հիմնական մասը քպական ավագանու անդամներն էին ու նրանց մերձավորները։

«Հիմնականում ներկա էին ավագանու իրենց խմբակցության անդամները, իսկ բնակիչներից շատերը եկել էին Չարենցավանի անձնագրայինի հարցը խմբակցության առաջ բարձրացնելու համար»,- ասաց բնակիչը։

Հակոբյանը պատմեց, թե ինչ հանգամանքներում է եկեղեցին գնել շենքը։ «2000-ականների սկզբին հայտնի դարձավ, որ շենքը ցանկանում են գնել «Եհովայի վկաները», բարեբախտաբար, եկեղեցին նախաձեռնություն դրսևորեց և գնեց շենքը։ 2018 թ.-ին գործող իշխանությունների առաջ շենքի ճակատագրի հարց բարձրացրել ենք, բայց այն ժամանակ ՔՊ-ականներին այն քիչ էր հետաքրքրում։ Հիմա՝ հասկանալի պատճառներով, ակտիվացել են»,- նշեց մեր զրուցակիցը։

Նշենք, որ հարցի առնչությամբ պարզաբանմամբ հանդես է եկել նաև Կոտայքի թեմը, որտեղ մասնավորապես ասվում է․

Կոտայքի թեմի հայտարարությունը Չարենցավանի կինոթատրոնի շենքի մասին
Սիրելի՛ հավատացյալ քույրեր և եղբայրներ, Չարենցավան քաղաքի հարգարժան բնակիչներ,
Կոտայքի թեմը խորին երախտագիտություն է հայտնում ձեզ՝ տարիների ընթացքում ցուցաբերած ձեր համբերության, հավատարմության և հոգատար վերաբերմունքի համար, որը մշտապես մեզ զորացրել է մեր հոգևոր և մշակութային առաքելության ճանապարհին։
Տարիներ առաջ Չարենցավան քաղաքի կինոթատրոնի շենքը հանձվեց Կոտայքի թեմին՝ նպատակ ունենալով վերածել այն համայնքի կարիքների համար ծառայող եկեղեցապատկան կենտրոնի։ Ցավոք սրտի, ֆինանսական սահմանափակումների պատճառով երկար ժամանակ հնարավոր չի եղել իրականացնել շինության վերանորոգումը և դրա գործարկումն ըստ նպատակի։ Մենք լիովին հասկանում ենք ձեր սպասումը և այդ հարցում ունեցած ցավն ու մտահոգությունը։
Այսու տեղեկացնում ենք բոլոր մտահոգ քաղաքացիներին, որ Հայ Առաքելական Սուրբ Եկեղեցին և Կոտայքի թեմն ունեն մշակած ծրագիր, ըստ որի՝ կինոթատրոնի շենքը նախատեսվում է վերականգնել որպես մանուկների կրթության և մշակութային կենտրոն։ Այս կենտրոնը կծառայի մեր մանուկներին՝ դառնալով քրիստոնեական դաստիարակության, ստեղծագործ մտքի և ազգային արժեքներով լցվելու օջախ։ Այս ծրագիրն արդեն ընթացքի մեջ է։ Վստահ ենք, որ համատեղ ջանքերով և Աստծո օգնությամբ առաջիկայում այն անպայման կիրականացվի և Չարենցավանի սրտում իր դռները կբացի վերանորոգված և կյանքով լի մի կենտրոն, որից կօգտվեն հարյուրավոր ընտանիքներ։
Մեր երախտագիտությունն ենք հայտնում ամենքիդ, որ շարունակում եք մեզ հետ կրել հոգևոր-մշակութային կենտրոն կերտելու մեր տեսլականը։ Ձեր համբերությունը՝ մեր հույսի, ձեր հավատարմությունը՝ մեր տոկունության աղբյուրն է։
Թող Ամենակալ Տիրոջ օրհնությունը լինի մեր ժողովրդի բոլոր զավակների հետ՝ այժմ և միշտ և հավիտյանս հավիտենից։ Ամեն։