Միքայել Սրբազանը կարող է ազատ արձակվել

ՔՊ-ական իշխանությունների որոշումների մի մասը ողջմատերեն հնարավոր չէ բացատրել, հասկանալ։ Երեկ՝ հուլիսի 30-ին, Վերաքննիչ դատարանը մերժել է կալանք կիրառելու մասին որոշման դեմ Միքայել Աջապահյանի պաշտպանների բողոքները: Այս մասին տեղեկացնում է Աջապահյանի պաշտպանական խումբը: Այսինքն՝ Միքայել սրբազանը կմնա կալանքի տակ։

Միքայել սրբազանին ազատ չարձակելը հանրության, պետության համար վտանգավո՞ր է։ Նա կխուսափի՞ քննությունից։ Կարո՞ղ է առաջնորդել հեղափոխական շարժում կամ հեղաշրջում կազմակերպել։

ՔՊ-ականները, Փաշինյանի համակիրները, իշխանության աթոռներին ամուր սոսնձվածները ձևացնում են, թե վախենում են Միքայել Աջապահյանից։ Նրանք կարծիք են հայտնում, թե Միքայել Աջապահյանը կարող էր կազմակերպել հեղաշրջում։ Եվ նրան բանտում պահելը ապահովություն է ներշնչում։ Իշխանամետ շրջանակներում կարծում են նաև, որ եթե Միքայել Սրբազանը ոչ մի վտանգ էլ չի ներկայացնում, այնուամենայնիվ՝ նրան պետք է կալանքի տակ պահել, փաստացի պատժել, որպես խրատ ժողովդին, որ հեղաշրջման կոչ անելը շատ խիստ պատժելի է, անկախ այն բանից, թե ո՞վ է այդ կոչն անում, նա ի վիճակի՞ է հեղաշրջում առաջանորդել, նրա խոսքը բանի դնող կա՞, թե՞ ոչ։

ՔՊ-ականները, հավանաբար, հույս ունեն, որ Միքայել Աջապահյանին պատժելով, կարող են առաջիկայում ոչ միայն չեզոքացնել հեղաշրջման, հեղափոխության ռիսկերը, այլև բացառել նույնիսկ կոչերը։ Միքայել Սրբազանի նկատմամբ խիստ, ինչ-որ առումով՝ անմարդկային վերաբերմունքով ՔՊ-ականները ցույց են տալիս, թե ինչքան լուրջ են վերաբերվում իշխանությունը պահելու խնդրին։ Միքայել Սրբազանին կալանքի տակ թողնելով, նրանք ուղերձ են հղում ժողովրդին ու աշխարհին, որ իշխանության պահպանման հարցում անխիղճ քայլերի կարող են գնալ։ Այսինքն՝ Վերաքննիչի որոշմամբ ՔՊ-ական իշխաննությունները սարսափ են տարածում երկրում, որ նույնկերպ կվարվեն նրանց հետ, որոնք նման կոչեր կանեն։

Ժողորդի մի մասը, սակայն, կարծում է, որ Միքայել Սրբազանին պետք է ազատ արձակել։ Նրանց մի մասը ընդդդիմադիր հայացքներ ունի, մի մասը զուտ մարդասիրական մղումներով և ողջամտությամբ է կարծում, թե Միքայել Աջապահյանին կալանքի տակ պահելը սխալ է, անմարդկային։

Հիմնական փաստարկն այն է, որ Միքայել Սրբազանը քաղաքական գործիչ չէ, զուտ հոգևորական է։ Եվ նա քաղաքական գործունեություն ծավալելու, քաղաքական պատասխանատվություն ստանձնելու, շարժում, հեղափոխություն կամ հեղաշրջում կազմակերպելու, առաջնորդելու ցանկություն, մտադրություն չի հայտնել։ Ավելին՝ երբ հանրային որոշ գործիչներ առաջարկեցին նրան իմպիչմենտի վարչապետի թեկնածու, Սրբազանը կտրուկ և միանշանակ հրաժարվեց, պարզ ակնարկելով, որ քաղաքականությունն իր բանը չէ։

Այսպիսով՝ ենթադրելի է, որ Միքայել Սրբազանը ոչ միայն հեղաշրջում կամ հեղափոխություն չի կազմակերպելու, առաջնորդելու, այլև նույնիսկ որևէ կերպ չի ներգրավվելու քաղաքականության մեջ, շարունակելու է իր հոգևոր ծառայությունը։ Այսինքն՝ նա ՔՊ-ի համար որևէ վտանգ չի ներկայացնում։ Ժողովրդի մի ստվար հատված ամեն օր վատ բաներ է ասում Նիկոլ Փաշինյանի ու մյուսների հասցեին։ Միքայել Սրբազանին ազատ արձակելով, հանդիմանողների քանակը մեկով կավելանա, ինչն այնքան էլ սարսափելի չէ։

Ավելին՝ կարծիք կա, թե կալանքից ազատ արձակվելուց հետո Միքայել Սրբազանը ժամանակավորապես հրաժարվելու է հանրային ակտիվությունից, քաղաքական համատեքստ պարունակող հարցերին անդրադառնալուց, հեղաշրջան կոչեր անելուց և այլն։ Ոչ թե փոխելու իր կարծիքը Նիկոլ Փաշինյանի մասին, այլ այդ մասին բարձրաձայն չի արտահայտվելու։ Սա տրամաբանական է։ Ոչ ոք չի ուզենա վերադառնալ ԿԳԲ-ի պադվալ։

Կարճ ասած՝ Միքայել Սրբազանը կարող է ազատ արձակվել։ Նա հանրության, նույնիսկ ՔՊ-ի համար վտանգ չի ներկայացնում։ Եվ այս հաշվի առնելով, կարելի է ասել, որ նրան կալանքի տակ պահելը հակամարդկային է, անտրամաբանական, հակաժողովրդական։

Թաթուլ Մկրտչյան

oragir.news