Դատավարությունն աբսուրդի մի վերածեք. Հայկ Ալումյան
Երեւանի Կենտրոն եւ Նորք-Մարաշ վարչական շրջանների ընդհանուր իրավասության դատարանում այսօր` դեկտեմբերի 8-ին, զինված խմբի գործով նիստին հետազոտվում են գործում առկա ապացույցները: Երբ մեղադրող Գեւորգ Սարգսյանը հրապարակում էր գործում առկա փաստաթղթերի անունները, ամբաստանյալներից Վահան Շիրխանյանի շահերի պաշտպան Հայկ Ալումյանը հայտարարությամբ հանդես եկավ. «Միջնորդում եմ՝ դատավարական այս փուլը բաց թողնել, քանի որ գոյություն չունի փաստաթղթերի վերնագրերի հրապարակման փուլ: Պետք է հրապարակվեն ամբողջությամբ այն փաստաթղթերը, որոնց հետագայում մեղադրողն անդրադառնալու է իր մեղադրական ճառում»,-ասաց Հայկ Ալումյանը: Պաշտպանի այս պնդմանը մեղադրողն հակադարձեց. «Երբ ամբողջությամբ եմ հրապարակում՝ դժգոհում եք, երբ հակիրճ՝ էլի եք դժգոհում: Եթե կարիք կա, կարող եք միջնորդել, ես էլ ամբողջությամբ կհրապարակեմ: Ես հրապարակում եմ գործում առկա փաստաթղթերը եւ վերնագիր հասկացություն գոյություն չունի»: Հայկ Ալումյանը կոչ արեց դատարանին եւ մեղադրողին դատավարությունն աբսուրդի չվերածել. «Երբ իրեղեն ապացույցներն են հետազոտվում, գիտենք, որ կարող ենք մոտենալ, անհրաժեշտության դեպքում նաեւ շոշափել, իսկ հիմա փաստաթղթերն ենք հետազոտում եւ Դուք միայն վերնագրերն եք կարդում, սա էլ հո իրեղեն ապացույց չէ, փաստաթղթեր են, սրանք հո չեն հոտհոտում կամ շոշափում, հրապարակում են ամբողջությամբ, որպեսզի հասկանալի լինի՝ ինչի մասին է խոսքը»,- ասաց ալումյանը, և դիմելով մյուս ամբաստանյալներին ու նրանց պաշտպաններին, շարունակեց. «Փորձ է արվում մեր միջեւ սեպ խրել. այստեղ ակնարկներ են արվում, թե մենք ենք այնպես անում, որ ձգձգենք դատավարությունը, ինչու՞ են բոլորը մտածում, թե դատավարությունը վերջացավ, պետք է ազատ արձակվեն եւ գնան տուն: Մենք չենք ձգձգում դատավարությունը, այլ ես այն կարծիքին եմ, որ այն ինչ կատարվում է դատավարության ընթացքում, պետք է պատշաճ կատարվի»:
Հետևեք մեզ Viber-ում
