Իմ տնկածն իրավունք ունեմ կտրելու, թարս տնկելու. Ռուբեն Գևորգյանը՝ ծառահատումների մասին

Լրատվամիջոցներն օրեր առաջ անդրադարձել էին Դավիթաշեն վարչական շրջանում համատարած ծառահատումների խնդրին: Փաստի առիթով ոստիկանության Մաշտոցի բաժնի հետաքննչական բաժանմունքում նյութեր են ստեղծվել և պարզել՝ նշված ծառերը հատվել են Ազգային ժողովի նախկին պատգամավոր, «Ծաղիկ Ռուբո» մականվամբ՝ Ռուբեն Գևորգյանի դստեր՝ Դավիթաշեն, Մենատուն հասցեում հաշվառված Արմենուհի Գևորգյանի ցուցումով: Araratnews.am-ը կապ հաստատեց նախկին պատգամավոր Ռուբեն Գևորգյանի հետ՝ մեկնաբանություն ստանալու: «Դա իմ սեփական տարածքն է: Ծառերն էլ չորացած են եղել ու փտած: Եթե անգամ փտած ծառ էլ չլինեն, իմ տնկածն իրավունք ունեմ կտրելու, թարս տնկելու էլ, պառկացնելու: Իմ սեփական տարածքն ու այգին է»,- ասաց նախկին պատգամավորը, ապա հիշեցրեց՝ Դավիթաշենում առաջին թաղապետ եղած ժամանակ 55 հազար ծառ է տնկել: Ռուբեն Գևորգյանի խոսքով՝ հատված ծառերի տեղում «Ռիբոկ» մարզական ակումբի շարունակությունն է լինելու. «Ոնց որ «Ռիբոկը» սարքեցինք, դավիթաշենցիք ընկան արքայության մեջ, հիմա ավելի լավ բան ենք կառուցելու, որ վաբշե ընկնեն արքայության մեջ: Վատ բա՞ն ենք անում»: Նախկին պատգամավորը հերքեց, որ ոստիկանության Մաշտոցի բաժնի հետաքննչական բաժանմունքում նյութեր են նախապատրաստվել. «Ոստիկանությունը նյութեր չի նախապատրաստել, եկան տեսան, որ դա 20 տարվա սեփական տարածք է, շինթույլտվություն էլ կա, հեռացան: Ոչ մի գործ էլ չի հարուցվել»: Մեր դիտարկմանը, որ եթե անգամ սեփական տարածք է, ափսոս չէ՞ այդքան ծառ հատելը, Ռուբեն Գևորգյանն ասաց. «Ափսոս է, թե ափսոս չէ` դա իմ գործն է: Իմ սեփական տարածքն է, ինչ ուզում, անում եմ: Բայց հակառակի պես ավելի լավ բան եմ անում՝ հօգուտ դավիթաշենցիների»: Կապ հաստատեցինք ՀՀ ոստիկանության հասարակայնության հետ կապի և լրատվության վարչության հետ՝ իմանալու, թե ոստիկանությունը շարունակո՞ւմ է հետաքննությունը: «Հրապարակման հիման վրա հետաքննություն է կատարվում Ոստիկանության Մաշտոցի բաժնում»,- տեղեկացրին ոստիկանությունից: Հ.Գ. Araratnews.am-ը բազմիցս անդրադարձել է մայրաքաղաքում ծառերի հատման` տարբեր տարիների աղմկահարույց դեպքերին: Դավիթաշեն, Մենատուն հասցեում հաշվառված ծառերի «սպանդը» ո՛չ առաջին, ո՛չ էլ վերջին դեպքն է: Ավելին՝ դատելով լուսանկարներից՝ չես ասի, որ հատված ծառերը փտած ու չորացած են: Իսկ եթե անգամ դա այդպես է, ապա, ըստ «Հայաստանի անտառներ» ՀԿ ղեկավար, իրավաբան Նազելի Վարդանյանի` կանաչ տարածքների սեփականաշնորհվելու կամ վարձակալվելու դեպքում քաղաքապետարանը պետք է պայմանագիր կնքի կանաչ տարածքի սեփականատիրոջ կամ վարձակալի հետ՝ դրանց պահպանման համար: Այսինքն՝ առանց քաղաքապետարանի գիտության մայրաքաղաքում ոչ մի ճյուղ չի հատվում: Ու այսքանից հետո հարց է ծագում՝ ի՞նչ կանաչ գոտիների պահպանման մասին է թմբկահարում քաղաքապետ Տարոն Մարգարյանը, եթե գրչի մի հարվածով քաղաքի կանաչ գոտիները սեփականաշնորհվում են, դառնում շինություն՝ Երևանը վերածելով անապատի: