Անփոխարինելի մարդիկ չկան. Արմեն Ռոստամյանը Սերժ Սարգսյանի հետագա պաշտոնավարման մասին

ԱԺ «Հայ Յեղափոխական Դաշնակցություն» խմբակցության ղեկավար Արմեն Ռուստամյանը անդրադառնալով Gallup International Association-ի՝ Հայաստանում լիիրավ անդամ «Էմ Փի Զի» ՍՊԸ տնօրեն Արամ Նավասարդյանի անցկացրած հարցումների արդյունքներին, ըստ որի՝ Նախագահի վարկանիշը բարձրացել է, իսկ վարչապետինը՝ ընկել, ասաց, որ թերահավատորեն է մոտենում այդ հարցումներին: «Այդ ցուցանիշները, բնականաբար, պետք է իրենց ազդեցությունն ունենան հետագա բոլոր անելիքների վրա, բայց հանրային ընկալմամբ կարող է չերևալ, որովհետև տեմպերը դեռևս գոհացուցիչ չեն, բայց փոփոխությունների ուղղությունը, բազմիցս ասել ենք, որ ճիշտ է ընտրված։ Բայց որպեսզի հանրային ընկալումն էլ դրան նպաստի, պետք է տեմպերն ավելացնել»,- շարունակեց Արմեն Ռուստամյանը: Տեղեկացնենք, որ այդ հարցումների տվյալների՝ հարցվածների 26.7 տոկոսը դրական է գնահատում ՀՀ նախագահի աշխատանքը, 26.2 տոկոսը՝ ՀՀ վարչապետ Կարեն Կարապետյանի: Հարցումներից նաև պարզ է դարձել, որ Կարապետյանի վարկանիշը 85 տոկոսից նվազել է մինչեւ 57-ի: Դիտարկմանը, թե թերեւս հող են նախապատրաստում, որ 2018 թվականին Սերժ Սարգսյանը ստանձնի կառավարության ղեկավարի պաշտոնը՝ այդպիսով նաեւ երկրի ղեկավարումը, Ռուստամյանը չհամաձայնեց. «Որևէ հող նախապատրաստելու խնդիր չեմ տեսնում, ի՞նչ է հարցումներով են հող նախապատրաստում: Հող նախապատրաստում են գործողություններով, որոնք իրենց տրամաբանությամբ ընթանում են»: Հարցին` արտաքին քաղաքականությամբ զբաղվելու համար ՀՀԿ-ում կա՞ այնպիսի մարդ, որ կկարողանա փոխարինել Սերժ Սարգսյանին, Ռուստամյանը պատասխանեց. «Անփոխարինելի մարդիկ չկան, իսկ արտաքին քաղաքականությունը պետք է նոր որակով ու մակարդակով իրականացվի: Խորհրդարանական համակարգը ենթադրում է այդ առումով թիմային աշխատանք: Ես կարծում եմ` դրան համապատասխան պետք է վերադասավորվի արտաքին քաղաքականությունը»,- ընդգծեց պատգամավորը: Կարեն Կարապետյանը կկարողանա՞ փոխարինել Սերժ Սարգսյանին, Ռուստամյանը պատասխանեց. «Ինչո՞ւ չէ, Կարեն Կարապետյանը ցույց է տվել, որ չի՞ կարող, իհարկե, կարող է»: