Սամվել Ալեքսանյանը «սեւ ցուցակում»

2018 թվականին ընդառաջ խառն են ոչ միայն իշխող ՀՀԿ-ում, այլեւ ՀՅԴ-ում: Մի արտասովոր ու անհասկանալի  հայտարարություն տարածվեց, որից պարզ դարձավ, որ ՀՅԴ-ն աչք ունի Շաբոյանի պաշտոնի վրա եւ այլընտրանքային կառույց է ստեղծել ու զբաղվում է մենաշնորհներով, որի մասին հավանաբար ՀՅԴ-ում էլ քչերը գիտեն:  ՀՅԴ Բյուրոն ստեղծել է  Տնտեսական հետազոտությունների գրասենյակ, որն էլ կատարել է վերլուծություն ու ներկայացրել հանրությանը: Ուշագրավ է, որ գրասենյակի  թիրախում հայտնվել է նախեւառաջ Սամվել Ալեքսանյանը, եւ վերլուծությունն էլ հին ընկերները վերնագրել են «Կարագի գնի բարձրացման պատճառները. մենաշնորհների դեմ պայքարի մեխանիզմները»:  Ուշագրավ է այն առումով,  որովհետև հազար ու մի տեսակի սննդամթերք, ապրանք  է թանկացել վերջին տարիների ընթացքում, բայց ՀՅԴ-ն կարծես թե դրանցից անտեղյակ է: Իսկ ահա կարագը չաղ ու բախտավոր դաշնակցականների կյանքի անբաժանելի բաղկացուցիչն է: ՀՅԴ համապատասխան կառույցը հայտարարում է, որ «Ալեքս Գրիգը» կարագի շուկայում իրականացնում է միաժամանակ ներմուծում և մանրածախ վաճառք, հետևաբար, ՏՄՊՊՀ-ի կողմից «Ալեքս Գրիգի» գործունեությունը պետք է ուսումնասիրել ներմուծում-մանրածախ շղթայի համատեքստում, և ոչ անջատ.<<ՀՀ քաղաքացիները տարեկան սպառում են մոտ 1.5 կգ կարագ, ինչը մի քանի անգամ քիչ է ՌԴ-ից եւ ԵՄ երկրներից: Վերջին ամիսների ընթացքում կարագի գնի աստիճանաբար բարձրացումը իր հետ բերեց մեր հասարակության հերթական բողոքը, դժգոհությունը: Այժմ 1 կգ տեղական 72 տոկոսանոց կարագի մեծածախ գինը կազմում է 3700 ՀՀ դրամ, իսկ 82 տոկոսանոց նորզելանդականինը՝ 4000 ՀՀ դրամ>>: ՀՅԴ-ն սակայն սրանով չի բավարարվել եւ ուսումնասիրություններ ու վերլուծություններ է կատարել միջազգային շուկայում  եզրահանգելով. <<2017 թվականի վերջին կիսամյակի եւ 2018 թվականի տնտեսական կանխատեսումների համաձայն՝ ԵՄ-ի եւ Ավստրալիայի կաթի եւ կարագի արտադրության ծավալները աստիճանաբար աճում են, ինչը նպաստում է կարագի գնի իջեցմանը: Հայաստանի փոքր շուկայի եւ համակենտրոնացման բարձր մակարդակի պայմաններում գների իջեցումը տեղի կունենա ավելի ուշ` 2018 թվականի առաջիկն կիսամյակի ընթացքում: Հայաստանի կարագի շուկայում գործում են մեծ թվով ներմուծողներ եւ արտադրողներ, սակայն գերիշխող դիրք ունի «Ալեքս Գրիգ» ընկերությունը, որը իրականացնում է միաժամանակ ներմուծում եւ մանրածախ վաճառք: ՀՀ տնտեսական մրցակցության պաշտպանության պետական հանձնաժողովի կողմից «Ալեքս Գրիգի» գործունեությունը պետք է ուսումնասիրել ներմուծում-մանրածախ շղթայի համատեքստում, եւ ոչ անջատ: Հակառակ դեպքում կունենան այն, ինչ ունենք՝ մանրածախ վաճառքում գների սրթաց բարձրացում եւ գների իջեցման արգելակող էֆեկտ>>: Ինչպես հայտնի է նշված ընկերությունը պատկանում է ԱԺ ՀՀԿ-ական պատգամավոր Սամվել Ալեքսանյանին, ով համարվում է Հայաստանի տնտեսության  մայր երակը, սեւ կասսայի  ամենախոշոր մուծվողը: Այն պահից, երբ շրջանառվում է 2018-ին նոր կոալիցիայի ձեւավորման հավանականության լուրեր ու նոր հավակնորդների առանցքում Ծառուկյան դաշինքն է լինելու, ՀՅԴ-ում արշալույսները խաղաղ չեն եւ պահը բաց չեն թողնում կսմթելու թե իշխանություններին, թե նշված դաշինքին: Հիշենք, որ շաբաթներ առաջ ՀՅԴ-ականները, դիցուք ձեռնպահ քվեարկեցին ԱԺ-ի օրակարգի հաստատմանը՝ հասկացնելով իշխանություններին, որ մի օր էլ կարող են դեմ քվեարկել, կամ ընդհանրապես չմասնակցել քվեարկությանը ու գլխացավանք ստեղծել քվորման խնդիր ունեցող ՀՀԿ-ի համար: Հիմա էլ այս վերլուծական-գնահատման գրասենյակի ստեղծմամբ թերեւս հասկացնում են, որ հարկ եղած դեպքում ջրի երես կհանեն իշխանության տակ եղած կեղտերը, կթիրախավորեն ամենակարեւոր օղակը, անձին: Միայն թե հարց է ծագում՝ որտեղ էր մինչեւ հիմա դաշնակցությունը, ինչու չէր նկատել իշխանության հազար ու մի մենաշնորհները: Արդյոք եթե դրանց միջից նրա ընտրությունը կանգ է առել ընդամենը մեկ ընկերության ու մեկ սննդատեսակի վրա, կնշանակի դաշնակներն  հաշիվներ ունեն պարզելու Սամվել Ալեքսանյանից, թե խնդիրը ավելի խորն է եւ Ալեքսանյանը այդ պատճառով է հայտնվել սեւ ցուցակում: Անի Սահակյան