Առնվազն երկու պատերազմների մասնակից եմ և վախենալու բան չկա. Բաղունցը՝ իշխանությունների բռնաճնշումների մասին

Ես անձամբ, ինչպես արցախցիներից մեծամասնությունը, առնվազն երկու պատերազմների մասնակից եմ և վախենալու բան չկա, - Երեւանի Ազատության հրապարակում տեղի ունեցած ճեպազրույցում ասել է Արցախի Հանրապետության ԱԺ նախագահի տեղակալ Գագիկ Բաղունցը՝ արձագանքելով իշխանությունների կողմից դրսեւորվող ճնշումների մասին հարցին։

Արցախցի գործիչը վստահեցրել է, որ հակասահմանադրական, հակաօրինական ոչ մի քայլ չեն անում, այլ օրենքի, միջազգային նորմերի շրջանակներում պաշտպանում են իրենց իրավունքները։

Լրագրողի դիտարկմանը, որ արցախցի պատգամավոր Դավիթ Գալստյանին մեղադրում են ծրագրվելիք ահաբեկչությանը արցախցիներին ներգրավելու մեջ՝ Բաղունցն արձագանքել է՝ « Որեւէ մեկը կարո՞ղ է կոնկրետ մեղադրանք, կոնկրետ փաստ նշի, որ այդ մարդը ահաբեկչական ինչ-որ գործունեություն է ծավալել, ես օրինակ չգիտեմ»։

Գագիկ Բաղունցը պնդել է, որ արցախցիներին ներգրավում են միայն ու միայն ամբողջ հայ ազգի իրավունքների պաշտպանության, ազգային անվտանգության ապահովման խնդրում։ «Ոչ մի ահաբեկչություն արցախցիների կողմից չի ձեռնարկվում և չի պլանավորվում»,- նշել է գործիչը։

Նշենք, որ արցախցիների իրավունքների պաշտպանության խորհուրդը Երեւանի Ազատության հրապարակում հանրահավաք է հրավիրել. Գ. Բաղունցի փոխանցմամբ՝ Արցախի օրենսդիր եւ գործադիր մարմիններն այսօր հիմնականում զբաղված են Արցախի հայության սոցիալ-տնտեսական հարցերի լուծմամբ։