Վերանայումը կհամարենք հակասահմանադրական. Դավիթ Հարությունյան

ԱԺ-ում հարց-պատասխանի ժամանակ «Ելք» խմբակցության պատգամավոր Մանե Թանդիլյանը հետաքրքրվեց, թե երբ է կառավարությունը պատրաստավում անվավեր ճանաչել Վանաձորի ավագանու ընտրություններն ու արտահերթ ընտրություններ անկացնել: «Մեկ տարի շարունակ ապօրինի նիստեր են գումարվել, և մենք դիմել ենք ձեզ առաջարկով և պահանջով, որպեսզի դադարեցվեն Վանաձորի ավագանու լիազորություններն ու նոր  ընտրություններ անկացվեն», - հարցրեց պատգամավորը: ՀՀ արդարադատության նախարար Դավիթ Հարությունյանն էլ ի պատասխան ասաց, որ Հայաստանի կառավարությունը Վանաձորի ավագանու լիազորությունները վերանայելու անհրաժեշտություն չի տեսնում: «ՍԴ-ն ճանաչել է օրենքի որոշակի նորմեր, որոնց հիման վրա գործել է ավագանին, որպես Սահմանադրությանը չհամապատասխանող, միաժամանակ սահմանել է, թե երբ են այդ նորմերը կորցնում ուժը: Մենք Վանաձորում ունենք նոր իրողություն և եթե այն հնարավորություն ընձեռի ավագանուն պատշաճ գործելու, ապա որևէ հիմք վերանայելու ավագանու լիազորությունները, մենք չենք տեսնում և ավելին վերանայումը կհամարենք հակասահմանադրական», - նշեց նախարարը: Հիշեցնենք, որ նոյեմբերի 10-ին Սահմանադրական դատարանը 2016 թվականի մարտից Վանաձորի ավագանիում անցկացվող նիստերը հակասահմանադրական էր համարել, քանի որ քվորում չէր ապահովվել։ Նոյեմբերի 18-ին «Հայկական Վերածնունդ» կուսակցությունը, որի նախագահը Արթուր Բաղդասարյանն է, Վանաձորի ավագանու շրջանակում համագործակցության հուշագիր է ստորագրել Հանրապետական կուսակցության հետ։ Նույն օրը տեղի էր ունեցել Վանաձորի ավագանու արտահերթ նիստ, որի ընթացքում ՀՎԿ խմբակցության ղեկավար Արկադի Փելեշյանը նշանակվել է Վանաձորի փոխքաղաքապետ՝ ավելի վաղ ՀՀԿ-ՀՎԿ համագործակցության շրջանակներում: