Ծառուկյան դաշինքի գնահատականը

Ազգային ժողովում «Հայաստանի Հանրապետության 2018 թվականի պետական բյուջեի մասին» նախագծի վերջնական քննարկմանը Ծառուկյան» խմբակցության անունից ելույթ ունեցավ Նաիրա Զոհրաբյանը և հայտարարեց, որ իրենք դեմ են քվեարկելու նախագծին: Նա նախ հարց բարձրացրեց, թե ինչու նախագծի քննարկմանը ԱԺ դահլիճում ներկա չէին վարչապետն ու փոխվարչապետը: «Այն, որ կառավարության ղեկավարը, փոխվարչապետը այստեղ չէ, սա շատ պարզ խոսում է այն բանի մասին, որ չի հետաքրքրում իրենց այստեղ քննարկումները, քանի որ լավ գիտեն, որ ինչ էլ խոսեն, միևնույնն է՝ կա մեծամասնություն, որը կբերվի պատեհ պահի դահլիճ և երկրի տնտեսական կարևորգույն փաստաթուղթը կսղղացնեն և կանցկացնեն: Դրա համար Կառավարության մի քանի ներկայացուցիչներ են ներկա, որոնք վստահաբար ձանձրանում են ընդդիմության ելույթներից»,-ասաց նա: Նաիրա Զոհրաբյանն անդրադարձավ նաև պետական պարտքին և նշեց, որ հունվարի 1-ց ՀՀ յուրաքանչյուր քաղաքացու արտաքին պարտքի բեռը 2200 դոլար կկազմի և այդ պարտքն աճում է: Անդրադառնալով աղքատությանը՝ նա ասաց, որ Ազգային վիճակագրական ծառայությունը, որքան էլ ջանում է թվերը բերել բարեխիղճ տեսքի՝ հօգուտ իշխանության, բայց պաշտոնական թվերով ՀՀ յուրաքանչյուր երրորդ քաղաքացի աղքատ է: ՀՀ մոտ մեկ միլիոն քաղաքացի օրական վաստակում է ընդամենը 1000 դրամ: «Եկեք այդ 1000 դրամը համեմատենք այն խայտառակ գնաճի հետ, որը կա Հայաստանում: Բացարձակ համեմատության եզրեր չկան»,- ասաց Նաիրա Զոհրաբյանը: Պատգամավորը մեջբերեց Ֆինանսների նախարարի հայտարարությունը, թե մարդկանց մեջ չպետք է ծուլություն սերմանել: «Պետք չի դասագրքային աքսիոմ ասել, դե տվեք այդ հնարավորությունը մարդկանց աշխատելու, որտեղ են այդ հնարավորությունները, բացի ձեր ներդրումային փուչիկներից: Իրենք ամրացրեցին կոռուպցիան, տնտեսական մենաշնորհները, իրենք տեղավորվեցին, մերձավորներով ու թիմակիցներով: Տեղի ունեցավ արատավոր ճյուղի վրա նստածների կարգավիճակի փոփոխություն, ոչինչ ավելի»,