Եթե Սեյրան Օհանյանը համագործակցել է, հետևանքները ծանր կլինեն. Գ. Իսագուլյանը՝ Նորք-Մարաշի զինված խմբի գործով հրապարակված ձայնագրության մասին
«Ձայնագրություններն օպերատիվ աշխատանքի արդյունքում են կարողացել են ձեռք բերել, սակայն ես չեմ ցանկանում խախտել անմեղության կանխավարկածը: Այն, ինչ դատավարություն ընթացքում տեղի է ունենում, վերջնական կդառնա միայն օրինական դատավճռով: Եթե ձայնագրությունը ճիշտ է, ապա դա բավականին ծանր հետևանքներ պետք է ունենա, որովհետև մարդիկ, ովքեր ժամանակին զբաղեցրել են պետական բարձր պաշտոններ, անթույլատրելի է, որ նման արկածախնդիր մարդկանց հետ գնան համագործակցության, որոնք զինված գործողություն են անելու ՀՀ-ի ներսում: Եթե սա ճիշտ է, ապա ով էլ լինի, պետք է խիստ դատավճիռ լինի»,- լրագրողների հետ հանդիպմանը ,անդրադառնալով Նորք-Մարաշի զինված խմբի գործով դատական քննության ժամանակ հրապարակված ձայնագրությանը, որում գործով մեղադրյալներ Վահան Շիրխանյանն ու Արթուր Վարդանյանը խոսում են այն մասին, որ իրենք ունեն Պաշտպանության նախկին նախարար Սեյրան Օհանյանի աջակցությունը,հայտարարեց ՀՀ-ում ԼՂՀ մշտական ներկայացուցչության խորհրդական, խորհրդատու Գառնիկ Իսագուլյանը: «Իրականում Սեյրան Օհանյանը կարող է կապ չունենալ այդ ձայնագրությունների հետ: ՀՀ անկախության տարիների դատավարական փորձը ցույց է տվել, որ մարդիկ այս կամ այն զինված խմբին ոգևորելու համար կարող են ավելի ազդեցիկ մարդու անուն տալ:Եղել են նման դեպքեր, երբ տրվել են մարդկանց անուններ, որոնք կապ չեն ունեցել գործի հետ, ու այդ մարդիկ ջրից չոր են դուրս եկել: Ես կցանկանայի հավատալ այս տարբերակին, բայց եթե պարզվի, որ նման խոսակցություն եղել է, ապա հետևանքները ծանր պետք է լինեն: Որևէ կերպ չի կարելի արդարացնել նման բանը, առավել ևս ՊՆ նախարարի կողմից, քանի որ ՊՆ նախարարը համարվում է պետության 2-րդ դեմքը: Սակայն որևէ բան հայտնի չէ դեռ և լուրջ պետք է ուսումնասիրվի»,- ընդգծեց Գառնիկ Իսագուլյանը: Վերջինս այս ամենի հիմքում քաղաքական ենթատեքստ չի տեսնում: Իսագուլյանը նկատեց, որ զինված խումբն ավելի շուտ է սկսել իր գործողությունները, քան Սեյրան Օհանյանին ՊՆ նախարարի պաշտոնից ազատելը: «Մի մոռացեք, որ Սեյրան Օհանյանին նաև այլ բարձր պաշտոն էր առաջարկվել, մի մոռացեք, որ իշխանությունն այս ամենը ձեռքի տակ ունենալով, միևնույն է, փորձում էր հասկանալ իրականությունը: Սակայն այն, որ արձագանք չկա դեռևս, նշանակում է, որ մտորումների տեղիք է տվել, կարող է փաստ է, որի դեմ առարկել հնարավոր չէ: Կարող է, ճիշտ չի ասել Վահան Շիրխանյանը, քանի որ կան մարդիկ, որոնց ես տեսել եմ, չէ որ մի քանի գործով անցել եմ, ու ամբողջությամբ մեղավոր մարդիկ են եղել, իրենց անունները չեն տրվել, սակայն դատվել են անմեղները»,- ասաց Գառնիկ Իսագուլյանը:
Հետևեք մեզ Viber-ում
