Ինչու Միքայել Սրբազանը հրաժարվեց դառնալ վարչապետի միասնական թեկնածու

Նախօրեին աննախադեպ ծավալի և խայտառակ դրսևորումներով իրականացվեց նիկոլական իշխանության հարձակումը Հայ Առաքելական Սուրբ եկեղեցու և կոնկրետ Շիրակի թեմի առաջնորդ Միքայել արքեպիսկոպոս Աջապահյանի դեմ։ Դրան զուգահեռ արագ փոփոխվում էին քաղաքական դաշտում զարգացումները։ Նախ ՔՊ-ից հեռացված Հովիկ Աղազարյանն ու Հակոբ Ասլանյանը պատրաստակամություն հայտնեցին հրաժարվել իրենց թեկնածուից և որպես վարչապետի միասնական թեկնածու առաջադրել Միքայել Սրբազանին՝ սկսելով Նիկոլ Փաշինյանին անվստահություն հայտնելու գործընթաց։

Դրանից կարճ ժամանակ անց ՀՀ ԱԺ «Հայաստան» խմբակցությունը հայտարարեց, որ կպաշտպանի Միքայել Սրբազանի թեկնածությունը, եթե վերջինս համաձայնի այդ դերին։

Գտնվելով անազատության մեջ և արտաքին աշխարհի հետ սահմանափակ շփում ունենալով Միքայել Սրբազանը շատերի համար խիստ զարմանալի և անսպասելի հայտարարություն տարածեց փաստաբանի միջոցով․ «Ես լիովին բավարարված եմ իմ ծառայությունից իբրև հոգևորական, ուստի խնդրում եմ իմ անունը չշահարկել վարչապետի թեկնածուների շարքում»: Փաստաբան Արա Զոհրաբյանը՝ որպես ապացույց, Միքայել Սրբազանի ձեռքով գրված և ստորագրած այս հայտարարությունը նույնիսկ հրապարակեց ֆեյսբուքյան իր էջում։

ՀՀ ԱԺ «Պատիվ ունեմ» խմբակցությունն ուշացումով ևս պաշտպանեց Միքայել Աջապահյանի թեկնածությունը

Զուգահեռ ընթացող այս հանգամանքները ողջամիտ կասկածներ են առաջացնում, բայց այս պահին խոսենք, թե ինչո՞ւ այնուամենայնիվ Միքայել արքեպիսկոպոս Աջապահյանը հրաժարվեց դառնալ ընդդիմության միասնական թեկնածու։ Չէ՞ որ ակնհայտ էր, որ այդ պարագայում զարգացումները կարող էին թրիգերային դառնալ, վճռական տրամադրված և մոտիվացված զանգված կարող էր գեներացվեր, և, ի վերջո, հնարավոր կլիներ փողոցի ճնշման ներքո հասնել Նիկոլ Փաշինյանին անվստահություն հայտնելուն։ Առավել ևս, որ Միքայել Սրբազանը բազմիցս ապացուցել է, որ հայրենանվեր զավակ է և պատրաստ է ի շահ հավատավոր ժողովրդի ու Հայաստանի Հանրապետության՝ պատասխանատվություն ստանձնել։

Բայց Շիրակի թեմի առաջնորդին ճանաչողները նաև գիտեն, որ նա եկեղեցական սուբորդինացիան չափազանց հարգող, կանոնակարգին հետևող անձնավորություն է, և առանց Վեհափառ Հայրապետի օրհնության չէր կարող իր համաձայնությունը տալ նման ճակատագրական հարցում։ Մեր տեղեկություններով՝ քանի որ ձերբակալման պայմաններում գտնվող Միքայել Սրբազանն Ամենայն Հայոց Կաթողիկոս Գարեգին Բ-ի հետ կապի դուրս գալու և հարցը նրա հետ քննարկելու հնարավորություն չի ունեցել, հրաժարվել է վարչապետի միասնական թեկնածու դառնալու առաջարկից։

Այժմ հարցը տեղափոխվել է քաղաքական ուժերի և Վեհափառ Հայրապետի տիրույթ։ Կաթողիկոսը կօրհնի՞ և կաջակցի՞ Միքայել Սրբազանին՝ ժողովրդի և քաղաքական ուժերի պահանջով դառնալ ընդդիմության վարչապետի միասնական թեկնածու։

Թե դեպքերն ինչպես կզարգանան, ցույց կտա ժամանակը, բայց մեկ բան հստակ է՝ ադրբեջանաթուրքամետ այս իշխանությունը շարունակելու է ապականել Հայոց Սուրբ Եկեղեցին, ստորադասել Հայաստանի Հանրապետության շահերը և պղծել մեր բոլոր նվիրական արժեքները։

Անի Սահակյան