«ՀՀԿ-ն ընդամենն ուզում է շեֆին զանգի և զեկուցի, որ՝ «շեֆ, էդ քո ասած օրենքն ընդունեցինք»». Նիկոլ Փաշինյան
Ազգային ժողովի հերթական քառօրյայի մեկնարկին օրակարգը հաստատելու վերաբերյալ իր խոսքում ԱԺ «Ելք» խմբակցության ղեկավար Նիկոլ Փաշինյանն անընդունելի համարեց նստաշրջանի օրակարգում ներառված՝ Ընտանեկան բռնության կանխարգելման մասին օրենքի քննարկման համար սահմանված մեկ ժամ ժամանակը: «Երեկ ԱԺ խորհրդում որոշվեց, որ «Ընտանեկան բռնության կանխարգելման» օրենսդրական փաթեթը, որը բաղկացած է 8 օրենսդրական նախաձեռնությունից, պետք է քննարկվի 1 ժամ տևողությամբ»,- այսօր ԱԺ-ում հայտարարեց «Ելք» խմբակցության ղեկավար Նիկոլ Փաշինյանը: Նա նշեց, որ իրենք առարկել են՝ ասելով, որ ԱԺ-ում նման մայր օրենքի քննարկումը 1 ժամում քննարկելն անընդունելի է. «Եղան առաջարկներ նաև ՀՀԿ-ից, բայց չընդունվեցին: Հերթական անգամ մենք գործ ենք ունենալու այն երևույթի հետ, որ օրենքները ոչ թե քննարկվում, ընդունվում են, այլ սղղացվում են: « Բրյուսելում շեֆին զանգելու և զեկուցելու են, որ «շեֆ, գիտե՞ս՝ ինչ կա, էդ քո ասած օրենքն ընդունեցինք», որ այն ընդունվել է: Մենք կողմ ենք այս օրենքին, սակայն այն մենք ընդունում ենք մեր ժողովրդի, մեր երկրի համար եւ անթույլատրելի եմ համարում նման մակարդակով օրենքներ սղղացնելը»,- ասաց Նիկոլ Փաշինյանը: Օրակարգը, բնականաբար, քվեարկությամբ հաստատվեց առանց փոփոխությունների:
Հետևեք մեզ Viber-ում
