Ռուսաստանը նախապես տվել է իր համաձայնությունը

Քաղաքագետ Ալեքսանդր Մանասյանն այսօր Հայելի ակումբում անդրադարձավ ՀՀ-ԵՄ  համաձայնագրի ստորագրմանը՝ նշելով, որ  այդ իրողություններն ասում են այն մասին, որ այսօր աշխարհում կա 4 հզոր ուժային կենտրոն՝ ԱՄՆ, Եվրոպա, Չինաստան և Ռուսաստան։  Հետևաբար՝ ՀՀ-ԵՄ համաձայնագրի ստորագրումը, ըստ քաղաքագետի՝ վաղ թե ուշ պետք է տեղի ունենար, մի կողմից՝ Եվրոպայի ձգտումների համատեքստում, մյուս կողմից՝ մեր ցանկությունների համատեքստում. «Պաշտոնական Մոսկվան համաձայնեց, որպեսզի Հայաստանն ավելի սերտ կապերի մեջ մտնի ԵՄ-ի հետ։ Ռուսական հեռուստաալիքների քննարկումներին չպետք է ուշադրություն դարձնենք, որովհետև կա Մոսկվայի պաշտոնական դիրքորոշումը, և ինչքան ես եմ կռահում՝ Ռուսաստանը նախապես տվել է իր համաձայնությունը Եվրոպայի հետ մեր այդպիսի կապերի հաստատման համար»։ Քաղաքագետը «և՛-և՛» բանաձևը կոպիտ սխալ է համարում. «Երբ ընդգծվում է «և՛-և՛» բանաձևը, մենք ընդունում ենք մի երկրի կարգավիճակ, որը և՛ այստեղ է, և՛ այնտեղ, և ռուս քաղաքագետը պատահական չի ասում, որ երկու աթոռի վրա նստել չի կարելի, վաղ թե ուշ մեկ աթոռի վրա պետք է նստել։ Ես կարծում եմ, որ մեր այդ քայլը պետք է փաթաթենք և այլ քարոզչական, գաղափարախոսական, քաղաքակրթական փաթեթում դնենք։ Դա այն է, որ Հայաստանն այդ երկու ուժային կենտրոնների միջև կարող է դառնալ կամուրջ։ Երբ մենք ասում ենք՝ «և՛-և՛», նշանակում է՝ մենք կարող ենք մեկը թողնել, մյուսում մնալ, իսկ երբ ասում են՝ մենք կամուրջ ենք, թողնելու խնդիր չի առաջանում։ Դրանք տարբեր դերակատարություններ են, դա մի շանս է, որը տրված է մեզ, և մենք պետք է պատվով կարողանանք այդ բանն անել, ոչ թե ամբողջ օրը խոսենք «և՛-և՛»-ի մասին»։