Խամենեին մահմեդական երկրներին կոչ է արել դադարեցնել Իսրայելին տրամադրվող ցանկացած օգնություն
Իրանի գերագույն առաջնորդ այաթոլլահ Սեյեդ Ալի Խամենեին հայտարարել է, որ մահմեդական երկրները պետք է դադարեցնեն Իսրայելին տրամադրվող ցանկացած օգնություն և կանխեն Գազայի հատվածում պաղեստինցիների դեմ նրա «հետագա դաժան գործողությունների իրականացումը», հաղորդում է Mehr գործակալությունը։
«Պաղեստինն օկուպացրած սիոնիստական հանցագործ խմբավորումը Գազայում ողբերգությունը հասցրել է անհավանական մակարդակի՝ սարսափելի դաժանությամբ և աննախադեպ չարությամբ։
Պաղեստինցի երեխաներն այսօր մահանում են ոչ միայն ռումբերից, գնդակներից և հրթիռներից, այլև ծարավից և սովից։ Իրենց սիրելիներին, երիտասարդներին, հայրերին և մայրերին սգացող ընտանիքների թիվն օրեցօր աճում է։ Ո՞վ պետք է դիմակայի այս մարդկային աղետին։ Անկասկած, իսլամական կառավարություններն են առաջինը պատասխանատու այս պարտականության կատարման համար, և մարդիկ պետք է նման գործողություններ պահանջեն իրենց կառավարություններից։ Մահմեդական կառավարությունները կարող են տարբեր քաղաքական հայացքներ ունենալ տարբեր հարցերի շուրջ, բայց դա չպետք է խանգարի նրանց համաձայնության գալ և համագործակցել Գազայում ծանր իրավիճակի պարագայում», -իր ուղերձում նշել է Իրանի գերագույն առաջնորդը։
Հետևեք մեզ Viber-ում
