«Բոլորը չէ, որ ուրախ են այս համաձայնագրի առկայությամբ». Արթուր Ղազինյան
ԱԺ-ում «Հայաստան-ԵՄ. համապարփակ և ընդլայնված գործընկերություն» թեմայով խորհրդարանական լսումների ժամանակ Եվրոպական հետազոտությունների կենտրոնի ղեկավար Արթուր Ղազինյանը նշեց, որ մեր առևտրային ճանապարհն անցնում է Պարսից ծոցից դեպի Սև ծով անցնող ռազմավարական ճանապարհի միջով, ինչը նշանակում է, որ եվրոպական շուկայի մատակարարվող ապրանքների մի որոշ մասը պետք է անցնի ՀՀ տարածքով, և որ իրականում մեր պոտենցիալը շատ ավելի մեծ է, շատ ավելի խորն է։«Մեր դիպկորպուսին հաջողվեց անել առավելագույնը, սակայն մենք անցել ենք ճանապարհի ընդամենը 10 %-ը, այսինքն՝ բարեհաջող կերպով կարողացել ենք ստորագրել այս համաձայնագիրը, սակայն առջևում մեզ դեռ սպասում է բավականին բարդ մի գործընթաց՝ վավերացման գործընթացը»,- ասաց նա: Ինչպես նշեց՝ ոչ բոլորն են ուրախ ՀՀ-ԵՄ համաձայնագրի ստորագրմամբ: «Պետք է խոստովանել, որ բոլորը չէ, որ ուրախ են այս համաձայնագրի առկայությամբ։ Պաշտոնական դիրքորոշմամբ խնդիրներ չդրվեցին, բայց հետո իրենց փորձագետների կողմից ռուսական մեդիայում արշավանք սկսվեց։ Ինձ համար տարօրինակ էր, թե ինչու է այս հարցին արձագանքում ՌԴ ԱԳՆ-ն, եթե այստեղ կա ԵԱՏՄ, որն ի պաշտոնե կոմպետենտ և իրավասու մարմինն է հայտարարելու, որ այս համաձայնագիրը չի հակասում ՀՀ ԵԱՏՄ անդամակցության համար սահմանված պարտավորություներին, այսինքն՝ կա ՄԱԿ-ի սկզբունքներ, որտեղ սահմաված են, որ պետությունները հավասար են և յուրաքանչյուրը գործում է իր իրավասության սահմաններում։ Այսինքն՝ ՀՀ-ն իրացրել է իր Սահմանադրությամբ սահմանված ինքնիշխան իրավունքը, ստորագրել է պայմանագիր»,- ասաց նա:
Հետևեք մեզ Viber-ում
