Քաղաքական անմեղսունակությո՞ւն, թե ծառայություն իշխանություններին

Ելք-ը նույն ջանասիրությամբ շարունակում է առաջ բրդել իր նախաձեռնությունը Հայաստանի Հանրապետության մասով Եվրասիական Տնտեսական Միության պայմանագրի գործողությունը դադարեցնելու գործընթաց սկսելու վերաբերյալ։ Երեկ այս թեմայով խորհրդարանական լսումներ էին հրավիրել, այսօր ԱԺ արտաքին հարաբերությունների հանձնաժողովում նախագիծը քննարկել։ Ելք-ի պատգամավորներն իրենց նախաձեռնությունը հիմնավորում են փաստերով, որ ԵԱՏՄ անդամակցության 3 տարում Հայաստանի ՀՆԱ-ն դոլարային հաշվարկով կրճատվել է 8%-ով, զբաղվածության մակարդակը՝ 13%-ով, միջազգային պահուստները` 40%-ով, պետական պարտքն աճել է 10%-ով, միաժամանակ ներդրումների զուտ հոսքերը 2014 թվականին կազմել են 167.4 մլրդ դրամ, իսկ 2016-ին դրանք նվազել են` հասնելով 81 միլիարդ դրամի։ «Ես ցանկանում եմ մեր քաղաքացիներին տեղեկացնել, որ ԵԱՏՄ համաձայնագիրը չի գործում, քաղաքացիների դեպորտացիան սովորական երևույթ է դարձել հատկապես ԵԱՏՄ անդամ ամենախոշոր երկրում՝ Ռուսաստանում, վարչական երեք իրավախախտման դեպքում իրականացվում են ՌԴ-ից ՀՀ քաղաքացիների դեպորտացիաներ, Ռուսաստանից Հայաստան ապրանքների և ծառայությունների արտահանման ժամանակ գործում են ֆինանսական դժվարություններ, ՌԴ արտագնա աշխատանքի մեկնած ՀՀ քաղաքացիները չեն կարողանում Հայաստանի վարորդական իրավուքններով այնտեղ տնտեսական գործունեություն իրականացնել»,-այսօրվա նիստում էլ հայտարարել է Մարուքյանը։ Իհարկե, ընդունելով այդ ամենը եւ այն, որ ԵԱՏՄ-ն մեզ վնասից բացի օգուտ չի տվել, այդուհանդերձ խիստ անհասկանալի է «Ելք»-ը ինչպե՞ս է պատկերացնում Ռուսաստանից կախվածության մեջ գտնվող Հայաստանը ինչպես կարող է իրեն թույլ տալ դուրս գալ այդ միությունից, երբ Հայաստանում ամենամանր հարցերը լուծվում են Ռուսաստանի թելադրմամբ։ Մի՞թե հիմա հնարավոր է այդ ճանապարհով ընթանալ։ Միթե ելքը քաղաքականապես այսքան անմեղսունակ է, որ չի հասկանում այս մասին։ Ամենայն հավանականությամբ Հայաստանում փորձ է արվում ձեւավորել ընդգծված արեւմտամետ ընդդիմությունը, որը հարկ եղած դեպքում Սերժ Սարգսյանին Ռուսաստանի առջեւ մանեւրի հնարավորություն կտա։Իսկ առհասարակ որպես կանոն նման միությունները մահանում են բնականոն ճանապարհով, ինչպես օրինակ ԽՍՀՄ-ն։ «Ծառուկյան» խմբակցության պատգամավոր Արարատ Զուրաբյանը այս համատեքստում բազմանշանակ հարց ուղղեց Մարուքյանին՝ ինչու՞ հարց չի դրվում ԱՊՀ-ից դուրս գալու, ՀԱՊԿ-ից դուրս գալու և ինչու՞ հարց չի դրվում Հայաստանի իշխանությունների առջև՝ սկսել բանակցություններ նոր ասոցացման համաձայնագիր ստորագրելու վերաբերյալ։ Մարուքյանն ասաց, որ «Ելք» դաշինքի տեսլականը հետևյալն է․ «Մենք ջատագովներն ենք ասոցացման համաձայնագրի՝ պահպանելով ԱՊՀ և այլ երկրների հետ մեր հարաբերությունները։ Ինչու՞ հարց չի դրվում ՀԱՊԿ-ից դուրս գալու։ Երբ որ մենք կունենանք ինչ-որ այլ անվտանգային համակարգ՝ որպես այլընտրանք առաջարկելու ՀԱՊԿ-ին, և ՀԱՊԿ-ը մեզ կխանգարի դրան անդամակցել, մենք կքննարկենք այդ հարցը։ Իսկ ԱՊՀ-ի հետ կապված՝ դա մեզ չի խանգարում այլ երկրների հետ տնտեսական գործունեություն ծավալելու և չի ոտնահարում Հայաստանի շահերը»։ Արձագանքելով Մարուքյանի պատասխանին՝ Արարատ Զուրաբյանն ասաց․ «Ես կարծում եմ՝ այս կառույցներից որևէ մեկից դուրս գալը նույնն է, ուստիև գտնում եմ, որ ավելի նպատակահարմար կլիներ ձեր այդ այլընտրանքային կոչված բանակցությունները վարվեին, հասնեիք մի մակարդակի, որ Հայաստանն իրոք ունենար այլընտրանք, նոր այս հարցը դրվեր։ Ես կարծում եմ, որ այս հարցի բարձրացումը դիտարկվելու է Հայաստանի կողմից հեռացում»։ Նույն խմբակցության պատգամավոր Արայիկ Աղաբաբյանն էլ ասաց, որ ինքը կարծում է՝ ճիշտ կլիներ, որ սպասեինք, չշտապեինք, քանի որ Հայաստանը օրերս ԵՄ-ի հետ ստորագրեց նոր համաձայնագիր։ Ի դեպ, եթե Աղաղաբաբյանը դեմ քվեարկեց, որպեսզի նախագիծը մտնի մեծ օրակարգ, ապա Զուրաբյանը կողմ էր։ Գրանցվեց երկու կողմ ՝ Զոււրաբյանն ու Արտակ Զեյնալյանը: Դեմ քվեարկեցին պատգամավորներ Արտաշես Գեղամյանը, Արայիկ Աղաբաբյանը, Շիրակ Թորոսյանը, Հերմինե Նաղդալյանը, Արմեն Աշոտյանը և Արմեն Ռուստամյանը: Նոր կանոնակարգը սակայն թույլ է տալիս, որ բացասական եզրակացությամբ էլ նախագծերը մտնեն լիագումար նիստի օրակարգ, եթե ընդդիմությունն է առաջարկում։ Անի Սահակյան