«Կուճի»-ի սպանության մեջ կասկածվում է 27-ամյա երիտասարդը. պատճառը՝ հայհոյանքն էր

Երեւանում այսօր սպանություն է տեղի ունեցել Սարի Թաղի 18 փողոցի թիվ 69 տանը, որտեղ խոհանոցի հատակին հայտնաբերվել է 64-ամյա Գագիկ Հովհաննիսյանի դին՝  կտրած-ծակած վնասվածքներով: Սպանվածը նախկինում 6 անգամ դատապարտված եղել, հայտնի է «Կուճի» մականվամբ: Մեր տեղեկություններով, իրավապահ մարմիններին արդեն հայտնի է 27-ամյա կասկածյալի ինքնությունը: Նույն այդ տեղեկություններով՝ կասկածյալ-երիտասարդն իր բարեկամուհու հետ է եղել, երբ Գագիկ Հովհաննիսյանը հայհոյանքներ է հնչեցրել, երիտասարդը մի քանի անգամ դիտողություն է արել հայհոյելու համար, ապա վիճաբանություն է սկսվել, որն ավարտվել է դանակահարությամբ. երիտասարդը դանակի մի քանի հարվածներ է հասցրել Հովհաննիսյանին, ինչի հետեւանքով էլ վերջինս մահացել է: Դեպքի առթիվ հարուցվել է քրեական գործ՝ ՀՀ քրեական օրենսգրքի 104 հոդվածի 1-ին մասի հատկանիշներով (դիտավորյալ սպանություն): Քիչ առաջ ՀՀ քննչական կոմիտեն հաղորդագրություն է տարածել՝ նշելով, որ ձեռք բերված ապացույցների հիման վրա որոշում է կայացվել՝ 27-ամյա երիտասարդին որպես մեղադրյալ ներգրավելու և նրա նկատմամբ հետախուզում հայտարարելու մասին: